Omukanda gwa zi mombelewa yomuleli gwoshilongo tate Hage Geingob uunambo oya ti aantu naya hulithe po omitotolombo ndhoka tadhi ti omukokolipresidende tatekulu Sam Nujoma ota ehama.
Omukanda gwa tuminwa iikundaneki ogwa ti ombelewa yomuleli gwoshilongo oya uvithwa nayi kookalegetse mboka taya andjaganeke oohapu dhiifundja tadhi ti kutya tatekulu Nujoma ke li monkalo tayi nuwa omeya.
“Ombelewa yoshilongo otayi lombwele oshigwana ashihe kutya kamu na uushili moohapu ndhoka.
“Omukokoli oku li nawa, nokape na sha tashi limbilike nenge tashi etitha omaipulo kombinga yuukolele we.
“Aantu mboka taya popi oohapu ndhoka otaya pukitha oshigwana nomalalakano gawo gokushundula edhina lyomukokoli.
“Omukokoli okwa lwila oshigwana shaNamibia sigo sha mono emanguluko momasiku 21 gaMaalitsa gwo1990, shoka sha pula ombinzi oyindji nuupenda owindji. Okwa kondja wo pethimbo lyemanguluko opo a ete ehumokomeho lyoshigwana.
“Ano molwa oshilonga shoka sha simana eshi longa, osha pumbiwa opo ku gandjwe esimaneko kuye aluhe. Omifofodholo nomalwaambo kombinga yuukolele we nayi mone ehulilo.”
Ombelewa yoshilongo oya pula wo opo aatoolinkundana naakwashigwana ayehe ya yande oku longekidha nenge oku taambathana oohapu dhomitotolombo ndhoka tadhi lalakanene ashike oku eta evundakano moshigwana.
Methano: Omukokoli-Presidende Sam Shafiishuna Nujoma, (ethano kuNBC).
