Emanyadhimbuluko lyopashinanena molwa uupendafule miita womukwaniilwa Nehale lyaMpingana ndyoka lya dhikwa puAmutuni (Namutoni) mEtosha National Park nolyasiikululwa momasiku 29 Januali 2022 kOmupresidende Hage Geingob pamwe nOmukwaniilwa gwOndonga Tate Fillemon Shuumbwa Nangolo, osho tali monika ngeyi.
Nonando omandengu gomukwaniilwa Nehale ogendji ngaashi Amupanda gwaShiponeni, Shivute shaNdjongolo, Uukule waAmulungu, Namupala gwaAmoomo nayalwe opo ya lala mpaka pwa dhikwa emanya, Nehale okwa li a popitha aakwiita ye mboka ya galuka kolugodhi ta ti:
“Twa hingi iita naakwiita yAandowishi momasiku ngaka (28 Januali 1904). Otwa sindana. Aandowishi twe ya tidha po (puAmutuni) notwa kwata ko omaliko gawo. Nampongo okwetu gama.”
Omundohotola Job Shipululo Amupanda ngoka oye gumwe gomwaamboka ya ninga omalongekidho gemanya ndika lyi dhikwe po mpaka puAmutuni-gomanenge ota monika methano ndika.
“Ngashingeyi osha pwa, shi i li notashi kalelele sigo omapipi tage ye!” Amupanda ta ti.
