Ehangano hali longo olusheno lyedhina NamPower olya ti itali tsikile we manga noompangela dhalyo dhokuteta ko olusheno kookasitoma dhalyo ndhoka dhi li moondjo.

Shika otashi ningwa molwashoka epangelo olya ti otali idhopo mo moshikumungu.

Nampower okwa li a tseyitha iiwike iyali ya piti kutya ota tula po omilandu dha yaga kegonga, ano ta tete ko olusheno lwakehe ngoka e na oondjo, nokwa li a tameke okuteta ko olusheno momasiku gaheyali gomwedhi nguka.

Ihe Minista gwIimaliwa nOmahangano gaYama kEpangelo tate Ipumbu Shiimi okwa li i idhopo mo moshinima sho a nyolele omunashipundi gwElelo lyaNampower ta ti Nampower na ethe po oompangela ndhoka dhokuteta ko olusheno.

Nampower okwa li a dhiki oonyala mevi ta ti ita taamba ko elombwelo lyaMinista.

Ihe ohela Nampower momushangwa okwa ti ota hulitha po okuteta ko olusheno oshoka epangelo olya ti otali ka kwatha Nampower opo a pande ko oongunga dhe kookasitoma sigo opehulilo lyaAguste nuumvo.

“Ano Nampower okwa tokola kutya oompangela dhoku teta ko olusheno otadhi hulithwa po manga sigo opehulilo lyaAguste 2023.

“Ihe Nampower ota indile natango opo mboka ye li moondjo ya fute oondjo dhawo opo ehangano li tsikile noku gandja olusheno koshigwana,” Omushangwa gwa pitithwa momasiku 12 June 2023 tagu ti ngawo.

Methano: Omukuluntuwiliki gwaNampower tate Samson Haulofu okwa uva ko sho Minista Ipumbu Shiimi a popi.