Omuwiliki gwOmbaanga yaNamibia tate Johannes !Gawaxab okwa li a pandula aakuthimbinga yoshigongi sha li sha kundathana shimwe shomiinakugwanithwa iinene yombaanga ndjika.
Oshigongi shino sholudhu nduka sha li sha ningwa lwotango mondjokonona yombaanga ndjika osha li sha eta pamwe aanawino moshilonga shoonkambadhala shoku yanda engushuluko lyoshimaliwa shoshilongo.
“Sho tatu tula kumwe omitse ngeyi opo tu ukitheni ongushu yoshimaliwa shoshilongo kondjila ombwanawa nande pe na omashongo ogendji, osha simana oku ndhindhilika esimano lyoshinakugwanithwa shetu,” !Gawaxab ta ti.
Molwashoka okwa kala omashongo ngaashi ngoka giita yokiilongo yilwe, oondando dhiilandithomwa moshilongo nopondje tadhi londo pombanda, osho wo omalunduluko gonkalo yombepo, nomalunduluko tage etwa kuunongononi, !Gawaxab okwa ti oonkundathana dhawo odha li ano dha simana noonkondo.
“Otwi itula mo shili moku konga omaunongo noowino kehe ngaashi tashi vulika opo tu shilipaleke kutya otu shi nkene oshimaliwa shoshilongo tatu shi kaleke pongushu yi li nawa notashi endele pamwe nomalunduluko moshilongo nomuuyuni,” !Gawaxab ta gwedha ko.
“Ngeyi opo owala tashi kwatha mokuyambula po eliko lyoshilongo muuwanawa wAanamibia ayehe.”
Gavena gwOmbaanga yaNamibia okwa longitha wo ompito opo a tse omuthindo puuwanawa u li po molwa etulokumwe lyoDola yaNamibia noRanda yaSouth Afrika.
Methano: Gavena gwOmbaanga yaNamibia tate Johannes !Gawaxab.
