Omupangi ngoka a zile koSoomi e ta longo mOshipangelo shaNandjokwe oomvula dhi thike pomilongo ndatu nayimwe, nokwa li a tseyika nedhina “Gwanandjokwe” ota ka simanekwa mokafilima taka ulike ondjokonona ye noyaamboka ya li ya thigulula po oshilonga she.
Omupangi nguka nokwa li wo ondohotola edhina lye Selma Rainio okwa li a thiki mOndonga momumvo 1908, a zi koSoomi, e ta ningi omutoti po gwoshipangelo shaNandjokwe.
Rainio nguka okwa li a kala onkalamwenyo ye ayihe mOniipa, nokwa li a hulitha momasiku ga5 gaJanuali gwo1939 e ta fumvikwa momawendo gaNandjokwe mOniipa moka.
“Momasiku 22 gaMaalitsa, otatu ka kala niinyangadhalwa yopandjokonona mOnandjokwe, sho tatu ka dhimbulukwa esiku lyevalo lyaDr. Selma Rainio ngoka a li a tseyika koyendji nedhina Gwanandjokwe,” tate Kleopas Nghikefelwa ta ti.
“Otatu ka kala wo nedhimbuluko eti11 lyomusiuma yoshipangelo shaNandjokwe.
“Noshinima oshititatu tashi ka ningwa mesiku ndyono lyo22 gaMaalitsa osho oku pititha ofilima ndjoka tayi ulike aantu osho wo iilonga ya longwa kuyo moshipangelo shaNandjokwe pokati koomvula 1950 sigo 1980.”
Nghikefelwa ngoka oye omuwiliki gwomusiuma yoshipangelo shaNandjokwe okwa gwedha ko ta ti mesiku ndika lyo22 otaku ka kala aantu oyendji mboka ya longele moshipangelo shaNandjokwe oomvula dha piti.
“Aantu amuhe omwa tegelelwa mu thike opo tu tyapuleni noku dhimbulukwa iilonga yondjokonona ya longwa mOnandjokwe kaatoti po yomayakulo guunamiti mOwambo,” Nghikefelwa ta ti.
Methano: Ndohotola Selma Rainio, ngoka oye a lukilwa ooSelma ayehe mboka ye na iilukadhina yaGwanandjokwe.
