Ku Marx Itamalo |
AAKALIMO yomomukunda Edundja moshikandjohogololo Oshikango moshitopolwa sha Hangwena oye li ta ya lili noku dhimbulukwa ngoka a li nale minista omusamane Erkki Nghimtina.
Nghimtina ngoka a manene oondjenda dhe momasiku sho ga li ga8 gaFebuluali nuumvo mepipi lyomimvo 77, konima sho a li a yakukilwa kuuwehame wopakathimbo nokwa hulithile megumbo lye mEdundja esiku olyo tuu ndoka.
Nghimtina okwa ka la minista gwokabinete okuza momumvo 1997 sigo 2020 sho a thigi po opolotika.
Pethimbo ndoka okwa kala minista wEgameno, minista Gwiikwamina nOonkondo, minista Gwiilonga nOmalweendo, osho wo minista Gwaaniilonga.
Omunapolotika nguka ota ku hokololwa kutya okwa kala omuntu a kala noku gandja omakwatho mpeyaka naampeyaka.
Boas Hangula gwomegongalo lyaElcin mEdundja okwa hokolola nakusa Nghimtina onga ngoka a li kiihole na okwa kwathela mokutunga ongeleka ndjoka ompe mEdundja.
“Omusamane nguka ka li nando tomu pewa komuntu. Okwa li e hole aantu na okwa kala noku kwathela aantu moshitopolwa shetu osho wo megongalo lye tu,” tate Hangula ta ti.
“Omwenyo gwe nagu vululukwe mombili yaaluhe.”
Mboka ishewe ya lili Nghimtina, aanasikola posikola yEdundja Secondary School. Nghimtina ogumwe yomwaamboka ya li ya toto po osikola ndjoka, sho ya li ya totwa po niimaliwa yaavali.
Otaku hokololwa a li oye a tungitha po oongulu dhotango dhosikola ndjoka omanga ya li inayi ya mepangelo.
“Tatekulu Nghimtina okwa li kuume kosikola yetu. Nande a li kiilonga kOvenduka, okwa kala aluhe te ya oku pa aalongwa yetu omukumo ethimbo nethimbo aluhe uuna e ya po pegumbo,” Tangi Nghilalulwa, omulongi posikola mpoka ta lombwele onzonkundana ndjika oshiwike shika.
Meya gwelelondoolopa Helao Nafidi, Darius Shaalukeni, ngoka wo e li omushiinda gwanakusa Nghimtina, okwa hokololele Omutumwa News Online ta ti kutya, nakusa Nghimtimwa ina gandja owala omakwatho kiiputudhilo, ashike okwa kala wo nokukwathela aantu koohandimwe mboka yi iyadha momaudhigu pomudhingoloko ngoka gwEdundja.
“Otandi dhimbulukwa lela oshikando shimwe a li a fala iikulya kegumbo limwe moka mwa li aantu taya si ondjala,” tate Shaalukeni ta ti.
“Okwa li e ya faalele iikulya niikwathi yilwe. Oshinima shika tandi thamuna mpaka ihashi hala oku ningwa konyala kukehe gumwe.”
Shaalukeni okwa popi wo kutya nakusa Nghimtima oye wo a li a tungu po ombelewa yoSwapo moshikandjohogololo Oshikango mo2022. Ombelewa Nghimtina okwa li e yi tungitha po noshimaliwa tashi tengenekwa shi li pokati koN$300 000 noN$400 000, shazi mondjato ye mwene.
Shika okwa li e shi ningi konima sho iilyo yoSwapo moshitopolwa shOshikango ya li ye mu pula kutya oya pumbwa ombelewa.
Nghimtina okwa tegelelwa a ka fumbikwe komawendo gomapendafule kondoolopa yEenhana Olyomakaya tuuka.
Onzo yi shi okwiinekelwa oya li ya lombwele oshifo shika kutya Nghimtina okwa li a nyola kutya nafumvikwe momawendo pEdundja mpoka pwa fumvikwa yina nayinakulu osho wo aapambele ye yalwe.
Ashike, oshiwike shika, aanambelewa aakuluntu yetanga lyegameno nepangelo oya li anuwa ye ya kegumbo noku pula aapambele opo a ka fumvikwe kEenhana omolwa iilonga mbyoka a longela oshilongo.
Nghimtina okwa li a valelwa momukunda Eembidi moshitopolwa shaHangwena momumvo 1948. Okwa li a yi kondje yoshilongo a ka kondjele emanguluko nokwa mono omadhewo gopaukwiita koSoviet Union.
Okwa kala omukuluntu gwoshikondo shomakwatathano shetanga lyokakulumbwati oPLAN.
Okwa thiga ko omukadhi, oyana naatekulu.
Methano: Nakusa Erkki Nghimtina.
