kuMartin Negumbo naVictor Angula //
Aanangeshefa aashona yamwe yomOndoolopa yaNdangwa oya ninga “kadhila to nyanga ihupula” sho haya landithile ngashingeyi pooha dhopate onene nonando osha nika oshiponga kuyo.
Shika oshe etithwa sho aanangeshefa aanene yamwe ya tula ko oondhalate dhomakwega ya tenda ko omahala gawo opo pwaa landithilwe nando okomuntu komeho goositola dhawo.
Shika otashi etitha ohenda notashi yemateke oshoka onkalo ndjika oya nika oshiponga sho aantu mbaka ya hedha pooha dhopate unene noka pu na esiku inapu ngwandjulwa omuntu kosheenditho.
Omutumwa sho a talelepo ehala ndika pu na aalandithi mbaka pooha dhositola yedhina Pick ‘n Pay okwa mono kutya osho oshinima sha nika oshiponga unene.
Oomeme mbaka sho ya pulwa koshikundaneki kutya omolwashike ye na okulandithila mpono pwaa na egameno lya gwana nopu li pwa nika oshiponga unene tuu sho hapu ende iiyenditho tayi hingwa kaahingi ya yoolokathana yamwe ohaya kala yanwa, niitya yawo yene oya ti:
“Katu na nkene, oluhepo olwo talu thiminike tu landithile puukololo mpono tatu mono opo tu kwathele uunona wetu mbono wumwe wu li moosikola, nawumwe mbu uushona tu li nawo mpa.”
Meya gwOndoolopa yaNdangwa tate Paavo Amwele sho a dhengelwa ongodhi ka li ta kutha po. Ihe omupopiliko gwOndoolopa yaNdangwa meme Petrina Shitalangaho okwa lombwele oshikundaneki shika pangodhi ta ti: “Elelo lyOndoolopa yaNdangwa olya kala tali kambadhala oku kutha aantu mboka momapandaanda, ihe kashi ivule. Aluhe shampa ya mono ohauto yElelo ohaya fadhuka po nokuli.
“Oshi li sha nika oshiponga shili sho taya landithile ngawo pooha dhondjila onene. Ihe komatala inaya hala ko. Otaya kondjo notayanyangadhala ya mone omboloto, ihe omuntu ino pumbwa oku tula omwenyo gwoye moshiponga molwa omboloto.
“Ehala lyomalandithilo opo li li mpeya poABC ihe kapu na ngu a hala oku landithila po.”
METHANO: Oomeme mbaka otaya landitha ihe oye li moshiponga shoku pumwa kiiyenditho mOndangwa.
