Omuwiliki gwongundu yopapolitika yedhina Namibia Economic Freedom Fighters okwa ti epangelo nali kuthe onkatu ya kwata miiti e tali tidha mo aanangeshefa aakwiilongo unene tuu Aachiina nAaindia.

Omusamane Epafras Mukwiilongo okwa li a popi ndhika sho a li ta popi mOmutumba gwoPashigwana ta gandja omayele kOmupresidende Hage Geingob konima sho Geingob a li a gandja oshipopiwa she shOnkalo yOshigwana metine lya zi ko.

Mukwiilongo okwa li a lombwele Geingob ta ti: “Otandi ku pe oonkondo e to kutha oshiholelwa kuIdi Amini Dada ngoka a li nale Omupresidende gwaUganda.

“Nangoye wo kutha onkatu e to tidha mo aakwiilongo ayehe aanangeshefa oshoka otaya teya po oshilongo shetu.”

Ihe Omupresidende Geingob okwa li a yamukula Mukwiilongo a ti: “Sho nda li Ominista yIipindi nIikwafaambulika onda yile koChiina hoka nda li ndeya lombwele kutya Aachina mboka ye li taya ningi uunangeshefa moshilongo shetu oye li po itaya ihumbata nawa, noitaya futu nawa aaniilonga, naishewe otaya dhipaga po oongeshefa dhaantu yetu.

“Ihe onda yamukulwa kutya ngele Aachiina itaya iyutha koompango dhoshilongo shetu naya katukilwe oonkatu dhopaveta. Onda lombwelwa kutya okwa kala Aachiina aawanawa osho wo Aachiina aawinayi. Ano ngele Aachiina mboka aawinayi oye li po taya ningi iinima ya puka otse yeni tweya ethela.

“Naya iyuthe koompango dhoshilongo, naya ninge uunangeshefa mboka tawu tungu oshigwana ihe hakushi teya po.”

METHANO: Omuwiliki gwoNEFF Epafras Mukwiilongo