Omuleli gwoshilongo okwa ti okwaahe na ko nasha kwoshigwana okwe etitha opo ombuto yomukithi gwoCovid-19 gu galukile ishewe moshigwana e tagu etitha omaso gaantu 13 muule ashike womasiku 15 ga piti

Aantu aape mboka ya kwatwa kombuto yoCorona muule wiiwike iyali ya piti oye li omayuvi gaali omathele gane naantu omilongo mbali nayatano (2425).

“Shika oshe eta omwaalu gwaantu ya kwatwa kombuto yoCovid-19 pomayuvi omulongo nahamano omathele omugoyi naantu omulongo nayatatu (16,913), mboka yomuyo ye li 14,981 oya aluka, ihe ye li eyuvi limwe omathele gaheyali naantu omilongo hamano nayatano (1,765) taya lumbu natango nomukithi nguka, yo ye li 164 oya hulitha komukithi nguka okuza nkene gwa lopotelwe moshilongo lwopetameko lyomumvo nguka,” Omupresidente Hage Geingob ta ti ngaaka.

“Ano nandi kuthe okampito haka opo ndi gandje etumwalaka lyandje lyomahekeleko kaakwanezimo yAanamibia mboka ya kanitha oomwenyo dhawo molwa omikithi dhe etithwa kombuto yoCovid-19.

“Ekanitho lyeni olyo ekanitho wo lyetu, wo uuwehame weni owetu wo. Ito vulu oku tula ko ondando kongushu yomwenyo gwomuntu, ano opo nda popile te ti omwenyo gumwe gwa kana molugodhi lwokukondjitha oCovid-19, osho ekanitho enene.”

Presidente Geingob okwa li ta popi moshigongi shekuthiloko lyoshigwana kombinga yonkalo yoshigwana shi na sha nomukithi gwoCovid-19 sha ningwa nena momasiku 16 gaDesemba.

Geingob okwa ti molwashoka omwaalu gwaantu mboka taya kwatwa koCovid-19 ogwa kala tagu yi pombanda methimbo lyiiwike ya zi ko otashi pumbiwa opo pu ningwe omalunduluko moonkambadhala dhokukondjitha oCovid-19.

“Omangundumano gaantu ngashiingeyi oga ngambekwa e taku pitikwa ashike engundumano lyaantu ye thike pomilongo ntano (50) ngele oye li mongulu, ihe engundumano lyaantu ye li pondje otaya pitikwa ashike ya kale itaya kondo po pethele limwe (100),” Geingob ta ti.

Omupresidente okwa ti omambo gokunyola omadhina gaantu mboka taya gongala pehala lyontumba, okuzala uumasika, oshowo eiyogo koonyala noku kalathana oshinano lyometa netata oya pumbwa oku dhigininwa ethimbo kehe.

Oondingosho, omahala gomainyanyudho nomahala taga landitha iikulya ya pya otaya pulwa ya kale taya pata pomulongo guusiku okuza Omaandaha sigo Osoondaha.

“Ano onga oshigwana, natu ilongeni oku lumba noCovid-19. Omukalo gwoku igamena komukithi nguka, okugamena aakwanezimo yetu, aashiinda noshigwana shetu ashihe ogwo oku dhiginina omangambeko ngoka ga tulwa po,” Geingob ta ti.

Advertisements