Ehanganongeshefa lyomakwatathano gopaengodhi dhopeke oMobile Telecommunications (MTC) osho wo ehanganongeshefa hali andjaganeke olusheno kOnooli yoshilongo oNorthern Regional Electricity Distributor (NORED) ohela oya li ya longekidha esiku lyowina lyokunyanyukila pamwe naatoolinkundana mboka haya longele miitopolwa ngaashi Oshana, Omusati, Ohangwena nOshikoto.
Aaniilonga yaMTC noyaNORED mboka haya longo iilonga yi na sha nomakwatathano osho wo okugandja omauyelele moshigwana okupitila miikundaneki oya li ya ithana aatoolinkundana noya li ya uhala taya dhana omaudhano osho wo oku imwenyeka moBennies Park mOngwediva.
Kakele komaudhano opwa li wo iikulya niikunwa osho wo oomusika.
Konima yomaudhano opwa gandjwa oongodhi dhopeke ndatu. Maria David gwoInformante okwa pewa ongodhi yimwe sho a sindana po uudhano wedhina “Last Man/Woman Standing” mboka owo wa li wa hugunina nowa li tawu pula omatematika moshili.
Ndapanda Shuuya gwaNBC TV, naObrein Simasiku gwaNew Era oya pewa wo oongodhi molwashoka oya li ya kutha ombinga konyala momaudhano agehe gesiku.
Opwa li wo uulichacha tawu chawa. Ngoka a yamukula eyamukulo li li mondjila li na sha naMTC nenge NORED okwa li a pewa okalichacha voucha kongushu yoN$150.
Ihe molwashoka esiku olya li lyenyanyu aatoolinkundana ayehe mboka ya li ya holoka, ye li 27, oya li ya pewa omagano kehe gumwe ombiga yondilo ndhoka haku tiwa opressure cooker.
“Elalakano sho MTC naNORED twa longekidha esiku ndika olyo oku ninga tu tseyathaneni e tatu ningeni ookuume oshoka otseni oopatina molwa iilonga mbyoka hatu longo,” Simon Lukas ngoka oye omugandjimulombo gwaNORED ta ti.
Methano: Maria David naatoolinkundana yakwawo yamwe mboka ya li ya nyanyukwa unene otaya tyapula nokupandula MTC naNORED.
