ku Victor Angula |
Ewawa lyAanyasha yoSwapo, oSPYL, olya zi ishewe mokalungu tali ti kutya Omukokoli Presidende Sam Nujoma ita gandja nande ombili kaantu mboka taya pula opo a gandje ombili molwashoka okwa li a popi oomvula dhonale kutya aantu mboka ya shenguka kaye na mo ehala moNamibia.
Okavidio ka taambathanwa komalungula oshiwike sha zi ko otaka ulike tatekulu Nujoma ta popi niitya yemwene ta ti omashengelume nomashengekadhi kage na mo ehala moNamibia.
Aantu yamwe oya popi nduno taya ti kutya Nujoma okwa pumbwa oku gandja ombili molwa oshipopiwa shino eshi popile nale omanga a li omuleli gwoshilongo.
Ihe omukanda gwatuminwa iikundaneki gwa shangwa kuhamushanga gwomauyelele mEwawa lyAanyasha yOngundu Swapo, Gerson Lineekela Dumeni, ogwa yamukula komupopyo gwa li gwa pitithwa moshikundaneki shedhina Confidente moka omuwiliki gwehangano lyi lile po uuwanawa gwoombwanda niihwanga a popi ta ti tatekulu Nujoma okwa gwana shili okugandja ombili.
“OSWAPO Party Youth League (SPYL) otayi pula opo Nikodemus Kamanghoti a ethepo omapopyo goku pula Omukokoli Presidente a gandje ombili molwashoka e li ompinge nomashenge.
“Onga aagundjuka ya ndjangumukwa yoSwapo otatu indile opo Nikodemus a hulithe po mbala omaimonikitho ge mokulongitha nokunyateka edhina lyOmukokoli molwashoka Nikodemus ta hwahwameke epitikilopaveta lyuushenge,” Dumeni ta ti.
Dumeni okwa gwedha ko ta ti ongundu ye otayi endulula tuu oohapu dha popilwe komuwiliki gwewawa lyaanyasha Ephraim Nekongo kutya epitikilopaveta lyuushenge moNamibia osho oshinima sha puka noitashi ka tambulwako nande.
“Iilyo yoSwapo ayihe mbyoka tayi longo mepangelo nayi kundathane iinima yi nasha noshikumungu shokwaahena iilonga, okwaahena omagumbo osho wo ehumokomeho lyomutungilo gwoshilongo ngaashi sha nyolwa moondokumende dhongundu yoSwapo, moNDP5 noHPP2, ndele haku kundathana iinima yi nasha nuuwanawa womashenge.
“Nokuli omulumentu nenge omukiintu nguno Nikodemus na hulithe po oohapu dhe dhokutya okwa hala Omukokoli Presidende ngoka oye wo He yoShigwana kutya na gandje ombili kuyo.
“Naishewe aantu yehangano lyomashenge lyedhinaLGBT naya hulithe po omaindilo gawo omuwiliki gwoSPYL Ephraim Nekongo opo a thige po iilonga, oshoka hayo yemu pa iilonga ye nokuli.
“SPYL okwa tula uuwanawa komeho waakwashigwana yaNamibia oyendji, ano kaku na omatilitho nenge omambandameko taga ka ngambeka iilonga yetu ngaashi tweyi pewa kaakokoli yongundu yetu osho wo kekotampango lyongundu,” Dumeni ta ti.
Methano: Omukokoli-presidende gwaNamibia Dr. Sam Nujoma (ethano kuhistorica.fandom.com)
