Uuministeli wIikwamina nIikwankondo owa ti kutya ondando yomahooli otayi kala ngaashi yi li, noitayi lunduluka momwedhi nguka gwaAguste.

Momushangwa gwa pitithwa komugandjimulombo wUuministeli mbuka otaku tiwa oondando dhiikwamahooli pokati kiilongo yuuyuni oya kala tayi ningi ya yi pombanda ya gu pevi methimbo lyoomwedhi mbali dha piti.

“Konyala ondando yopetolola oya li ya londo owala okuza poUS$80 muJuni sigo US$85 muJuli, omanga ondando yondisela ya londo kashona okuza poUS$78 muJuni sigo US$79 muJuli nuumvo,” omugandjimulombo wuuministeli Andreas Simon ta ti.

“Shino osha li she etithwa molwa ompumbwe yomahooli ndjoka ya li ya yi pombanda miilongo yaaAmerika, Aanuuzilowopokati, Aayafrika yokUumbangalantu, osho wo iilongo yimwe yAaeropa.

“Pakutala konakuyiwa, oopeleisa dhomahooli otadhi monika tadhi ka tengauka noonkondo oshoka uupyakadhi woCovid-19 ndjoka tayi indjipala owo eshongo kiilonga yelanditho lyomahooli muuyuni nonando iilongo iikwamahooli yoOPEC oya ti otayi ka kala tayi pombo omahooli ge thike poombalili 400 000 mesiku okuza muAguste sigo oDesemba.”

Simon okwa ti odola yaNamibia oya li ya shuna pevi mongushu pakuyeleka nodola yaAmerika okuza poN$13.93 muJuni sigo poN$14.40 muJuli. Shika osha ningi opo Namibia a kale ta landa omahooli okuza pondje yoshilongo ta galulilwa ko oshendja yoosenda 91.23 molita kehe yopetolola omanga molita yondisela e na ko oshendja yoosenda 66.89.

Opo oshiketha oshilandimahooli pondje yoshilongo shaNamibia (Namibia Energy Fund) shi kale mo nawa sho shi ninge wo nawa aahingi yiitukutuku, epangelo olya tokola nduno opo ondando yomahooli yi kale inayi lunduluka omwedhi nguka.

Methano: Osevesa ompe yomahooli yaNamcor mOngwediva.

Advertisements