Ehangano lyuunona womekondjelomanguluko lyedhina Namibia Exiled Kids Association (NEKA) olya ti itali tsu kumwe netokolo ndyoka lya kuthwa kaaleli yoSwapo opo omusamane Phili ya Nangolo a galukile mongundu.
NEKA okwa pititha omushangwa gwa tuminwa kiikundaneki nena ta ti omahokololo ga pitithwa miikundaneki kutya Ya Nangolo ota ka taambwa ko nomaako agehe mOmaandaha opo a galukile mongundu otaga limbilike.
“Tate Phil ya Nangolo oye omulumentu gumwe e na ondjokonona yi shiwike nawa koyendji kutya okwa kala e na uutondwe komwenyo noSwapo osho wo nomupresidende gwayo kwali Dr Sam Nujoma,” osho amushanga ndjayi gwaNEKA Mao Angula a popi momushangwa.
“Tate Ya Nangolo okwa li oye kalagetse muungundu ngaashi oParents Committee, Forum For the Future, nehangano lyuuthemba womuntu oNational Society for Human Rights, osho wo galwe ngoka ga li noondjodhi osho wo omalalakano gokuteya po nokunkundipaleka oSwapo.
“Ondjokonona ya Ya Nangolo nooyakwawo oya nyolwa ya yela nkene ya kondjo nomukumo opo ya teye po oSwapo, unene tuu oku tuka nokunyateka edhina lyOmukokoli Presidende.
“Osho oshikumithi ngashingeyi sho omulumentu nguka a taambwa ko kewiliko lyoSwapo opo a ninge oshilyo shoSwapo.”
NEKA okwa gwedha ko ta ti okwa uva omifofodholo tadhi ti kutya oPolitburo noCentral Committee yoSwapo oyo ya ninga etokolo Ya Nangolo a galukile mongundu yoSwapo.
MoSwapo tate Ya Nangolo okwa li a za mo pethimbo oshilongo inashi manguluka konima sho a li ta finywaafinywa kutya okwa li ta longele kumwe noombulu.
“Oshoshili ngaa kutya oPolitburo noCentral Committee yoSwapo oya ninga etokolo ndika lya geyitha Aanamibia oyendji sho ya ningi etokolo lyaahe na uuwanawa woshigwana komutima? Shika otashi etitha omapulo. Nokuli NEKA, niilyo yoSwapo osho wo yongundu omwaina oMPLA oya hala oku uva ngele tate Phil Ya Nangolo okwa za mo moshipundi shoka a li nasho shoku kala omukalelipo gwaUNITA moNamibia,” NEKA ta popi ngaaka.
NEKA okwa ti kutya otaya dhimbulukwa kutya Ya Nangolo okwa li a hiywa kuUNITA a ka kale omutonateli gwomahogololo moAngola.
“Omuwiliki gwaUNITA Jonas Savimbi sho a hulitha, Phil ya Nangolo okwa li omuhiywa gowina. Ano iilyo yoPolitburo noCentral Committee yoSwapo aaholike, omatompelo ogashike tamu hiya Phil ya Nangolo moSwapo: ogo oku ngunda Omukokoli Presidende, okulengitha oSwapo, nenge oku tuka oondunge dhAanamibia aaholimbili ayehe? NEKA ota pula opo Phil Ya Nangolo a gandje ombili koshigwana nokOmukokoli Presidende!”
Sho a pulwa kOmutumwa ngele ekotampango lyoSwapo inali pitika omuntu a galukile mongundu ngele okwa kuthilwa po, Mao Angula amushanga gwaNEKA okwa yamukula ta pula wo kutya okatendo keni kekotampango lyongundu taka popi ngawo.
Methano: Oye hailwa-kwali Phil ya Nangolo.
