Aadhani yomashina kaleni aayidhidhimiki
KuMartin Negumbo |
Namibia shimwe shomiilongo mbi yi na aanangeshefa mboka haya mono iimaliwa okuzilila momashina gokundombola ngoka haga dhanwa komuntu to tula mo oshimaliwa.
Nonande omashina ngaka gomajekipota monale ogali ashike ga pitikilwa moongeshefa dhokasino, ngashingeyi omashina otaga adhika wo moombaa dhomalovu.
Konyala oshilongo ashihe mongashingeyi oombaa dhomalovu oonene noonshona odhi na omashina ngoka gomajekipota, nogeli haga dhanwa kaakwashigwana oyendji.
Omashina ngaka nonande oge li haga gandja oshimaliwa oshindji kaadhani yago nago wo ohaga vulu oku yuga omudhani gwago iimaliwa oyindji noonkondo.
Aadhani yomashina goludhi nduka oyendji ohaya kala ashike taya lalakanene okulya iimaliwa yo taya dhimbwa uukwatya weshina kutya nalyo ohali vulu kulya omuntu, naashika osho hashi eta aantu yamwe mboka haya lika po ya kanithe ombili yawo.
Yamwe uuna ya kanitha ombili ohaya ka ninga iinima inaayi tegelelwa. Yamwe ohaya tameke oku hinda nenge ya kondjele iimaliwa yayakwawo, yamwe taya tuku aalandithi yomoombaa.
Yamwe ohaya dhana po iimaliwa ya tumwa iipumbiwa yi na oshilonga na lwanima shampa ya lika po ohaya tuku oonakuya tuma nenge ya lundile aantu kutya iimaliwa oyeyi kuthwa, nenge ya kana.
Onga omushangi ote ningi onkambadhala opo ndi kumagidhe aadhani yomashina opo ya idhidhimike uuna ya lika po oshoka elikopo lyawo ohali teyagula po omitima dhawo ashike eshina onkene nga lya tema lyemu tega mu galuke.
Oshiningwanima oshiwinayi sha holoka omasiku gaziko shina sha nuupyakadhi womashina osho omulumentu gomimvo 44 a lika po keshina ndele manga ta zi mokakololo komashina okwa popithwa kumukwawo gumwe yeshaathane naye, ihe okwa tameke ta dhenge okamatyona noku ka ula iitya iiwinayi.
Kamatyona sho te ipupula okwa ka dhenga unene omulumentu ngoka.
Edhengo lyomulumentu nguka olya li li etitha ohenda nonande oye a hinda. Ngashingeyi okwa fa a dhengwa lwaali – keshina nokokamatyona.
Onkene ihumbateni nawa oshoka etango ohali shile gumwe. Tangi unene.
