Omupresidende gwaNamibia omundohotola Hage Geingob okwa li a lombwele Omutumba goPashigwana (opaliamende) kutya epangelo kali na oshimaliwa shoku gwedhela oondjambi dhaaniilonga yalyo.
Geingob okwa li a ti ngawo pethimbo a popi mopaliamende oku gandja oshipopiwa she shokomumvo hashi ningwa muApilili, e shi ningi ohela komatango.
Omutumba gopashigwana ogwa li gwa gongala, yo aanenentu yiikondo yoshilongo ngaashi aapanguli yopombanda, osho wo aakalelipo yiilongo mboka ye li moNamibia oya wo ye ya okupulakena koshipopiwa shOmupresidende.
Geingob okwa popi iinima oyindji, ihe shimwe shomuyo shi shi okunyanyukilwa koyendji osho egwedhelo lyopenzela yaanona ye na uulema ndjoka ya gwedhelwa okuza poN$250 sigo tayi ningi N$1300 omwedhi kehe okutameka momumvo tagu ya.
Ihe kombinga yoondjambi dhaaniilonga yiikondo yepangelo omuleli gwoshilongo okwa ti okwa kala ta kundathana naakalelipo yaaniilonga yepangelo sho taya pula ya gwedhelwe ko oopelesenda omulongo koondjambi dhawo.
“Onda ti kutya ano otaya pula ya gwedhelwe ko kwaashoka haya mono komwedhi, ihe ope na tuu aantu yamwe mboka ihaya mono sha nando. Onda ti wo kutya ongundu ndjika tayi lele oshilongo oya totwa po kaaniilonga. Ano omolwashike tamu ipula kutya ngame ngoka ndi li omuleli gwayo inandi hala epangelo li gwedhele oondjambi dhaaniilonga?” Geingob ta ti.
“Ano omolwashike ndi na oku kala inandi hala aaniilonga ya gwedhelwa? Noho kayi shi iimaliwa yandje oyo tayi gwedhele aaniilonga ngeno. Iimaliwa oyepangelo. Oshinima shi li po osho shoka kutya epangelo kali na oshimaliwa. Otulyeni muupyakadhi wopaliko.
“Nkene ngaa ndaya koshipundi shuuleli, otatu kondjo ashike nomaupyakadhi gokwaahe na oshimaliwa. Ano kapu na omuntu ta tindi opo aaniilonga ya gwedhelwe omanga oshimaliwa opo shi li. Oshimaliwa osho kashi po.
“Aaniilonga itaya gwedhelwa, netompelo tali ti ashike kutya kapu na oshimaliwa.”
Konyala aaniilonga ayehe moshilongo oya ningi ethimbo inaya gwedhelwa ko koondjambi, ihe yamwe mboka haya longele omahangano gamwe goongeshefa oya li tetwa koondjambi pethimbo lyokorona.
Ngashiingeyi oondando dhiikulya odha gwedhelwa, osho wo dhomahooli, nokwa tegelelwa wo oofuto dhoombesa nootekisi dhi kale dha gwedhelwa.
Ano oshigwana oshuuka methimbo edhigu pamahupilo.
Methano: Omupresidende Hage Geingob.
