Omeya ogo onzo ya simana noonkondo mokukalamwenyo okuwanawa kwaakwashigwana osho wo mekokeko lyeliko.

Advertisements

Nokuli momumvo 2016 ekonakono lya ningwa koNamibia Demographic Survey olya ulike kutya Oshitopolwa shaShikoto oshi na oopelesenda 93 dhomagumbo ge na omeya ga yela, nonando momahala ogendji ominino dhomeya odhi na oshimoko shi li pevi.

Ndhika odha li dha popiwa kuGavena gwOshitopolwa shaShikoto tate Penda yaNdakolo sho a gandja oshipopiwa she shokomumvo haku tiwa oState of the Region Address, oshiwike sha zi ko.

Ya Ndakolo okwa ti iikandjohogololo ngaashi Nehale lyaMpingana, Eengodi, nOkankolo oyi li natango mompumbwe onene yomeya ga yela.

“Aantu oyendji momikunda moka ohaya nu omeya goshimongwa nomeya inaga yela molwa ompumbwe yomeya,” Gavena ta ti.

Ihe Oshitopolwa osha ninga po ngaa sha, sho kwa fulwa oomboola noku tulwa ominino dhomeya komahala gamwe.

“Ano otandi pandula Oshikondo shokuAndjaganeka Omeya kOmikunda osho wo iikondo yilwe sho ya kandula po ompumbwe yomeya kaantu yetu yamwe mboka ya kala monkugo yinonkambe.”

Moshikandjohogololo shaNehale lyaMpingana omwa tsuwa oomboola heyali dhomomulongo nandatu dha fulwa koshimaliwa shi thike poN$1.9 miliona, e ta ku opalekwa oomboola mbali koshimaliwa shi thike poN$620,000.

“Oomboola ndhoka ngashingeyi otadhi gandja omeya moshigwana kaantu osho wo kiimuna. Ihe oomboola dhimwe odhi na omeya itaga shiwa okunuwa.”

Elelo lyOshitopolwa shaShikoto olya longo ominino ndatu, odho Omunino gwaNdinelago Elwatha mOshikandjohogololo shaLukonda, Omunino gwaEgolo Amikoka mOkankolo, nOmunino gwaOnangolo B mEengodi, dha pula oshimaliwa shi thike po N$800,000.

“Oondama dhaAmutenya gwaNuutumbo noyaOmtale gwaNuule nadho odha ningwa nawa koshimaliwa shoN$2.2 miliona sha za koNamibian Environmental Investment Fund,” Gavena ta ti.

“Oondama ndhika otadhi kwatha aakalimo yokomakuti hoka opo ya sinde omashongo gonkalo yombepo ndjoka tayi etitha uupyakadhi wompumbwe yomeya komahala gawo.”

Methano: Gavena gwaShikoto Penda yaNdakolo.