Oshiketha shoPenzela yAaniilonga yIikondo yEpangelo (GIPF) osha ningi oshigongiilonga niilyo yoshiketha okutopolelathana uuyelele kombinga yiilonga yoshiketha.
Iilyo mbyoka ya li ya holoka oya li yi li lwopomilongo ntano.
Aaniilonga yaGIPF oya li ya gandja uuyelele nkene iilyo yoshiketha yi na oku tula omapeko gawo melandulathano opo uunandoka omuntu ta thiki pomasiku gopenzela a pewe openzela ye meendelelo ngaashi sha pumbiwa.
Omuwiliki gwombelewa yaGIPF mOndangwa tate Nixon Hamutumwa okwa li a ndjandjukununa oshinakugwanithwa shaGIPF kiilyo, osho wo oshinakugwanithwa shiilyo ngele tashi ya pakugwanitha po iipumbiwa ayihe mbyoka tayi pumbiwa kombelewa yaGIPF molwa uuwanawa woshilyo.
Yimwe yomwaambyoka ya popiwa kuHamutumwa ongaashi esimano lyoku fala ko uuyelele manga ku na oomwedhi ndatu okuuka pomasiku oshilyo tashi yi mopenzela.
Uunandoka oshilyo sha hulu ko konima yoomvula ntano dhomopenzela osha simana opo shi thige po uuyelele wa yela mepeko lye lyokoGIPF, unene tuu ekwashilipaleko kutya omadhina gaathigululi oge li mondjila.
Hamutumwa okwa ti wo kutya osha simana opo aantu mboka ya hokana pamuthigululwakalo aakulukadhi ye vulithe pugumwe ya fale oonzapo dhoondjokana ndhoka opo uunandoka tashi ya petopolo lyuuwanawa, oonakuhokanwa ayehe ya mone sha ngele tashi ya pethigululo.
“Oondjendanayina nadho otadhi vulu wo oku thigulula ngele okwa kwatelwa mo muuthemba mboka,” Hamutumwa ta ti. “Oshiholelwa, ondjendanayina ngele oyi na he e li momwenyo ihe oha longo moshikondo shepengelo ota pu kala omapulo kutya ngele okwa thigulula huno, ye he nakuvala sho ta hulu ko ota ka thigulula ishewe hwiyaka kopenzela yahe omuvali?
“Iinima ayihe mbyoka oyi na okutalika.”
Nonando iilyo yaGIPF kaya li ya holoka koshigongi momwaalu ogundji, mboka ya li ya holoka oya li ya pewa ompito yokupula omapulo, e taya pewa omayamukulo ge ya mbilipalela.
Methano: Oshigongiilonga shaGIPF sha li sha ningilwa mEndiki lyOmauliko gIipindi gaNgwediva ohela komatango.
