kuMartin Negumbo //

Okwa kala etumbulo ndyoka hali popiwa kutya anuwa uuna wa hala okuholeka Omuwambo uuyelele wontumba omukalo omupu to vulu kuwu holeka onge wewu shanga.

Shika osho oshili, oshoka katu hole okulesha nonando otusheni okulesha.

Aantu oyendji nonando oye li ya mona elongo lyopetameko opu na mbono haya idhimbike okulesha nonando oye ku shi nawa.

Onkalo ndjika oyi li tayi ningi oshigwana shetu shi kale pevi e tashi shuna monima e tatu kala po kiilongo iikwetu mbyoka tayi pula komeho meputuko.

Okulesha oko oshinima sha simana kepipi kehe nonando pu na mboka yiipukitha kutya okulesha okwaanona owala. Hasho nando. Okulesha okwo omukalo gwa pumbiwa opo u mone uuyelele wontumba mboka wa li waa wu na.

Mokulesha oto mono mo uuwanawa owundji. Oto vulu wo ku mona mo uunongo wiihumithe komeho.

Olupandu olunene otandi lu pe aakwashigwana mboka ya li haya lesha omambo gawo pethimbo ya li mosikola ihe natango oye li haya lesha.

Ngashingeyi otu neni oshikundaneki shetu shika okupitila komalungula. Natushi lesheni aluhe tu uve e tatu kundana e tatu inongeke wo.

Kwaamboka kaamu hole okulesha iikundaneki ethimbo lyi li po onena opo wu ileshele iiningwanima pungoye mwene opo wu yande oku kala ho etelwa oonkundana kolukanda nenge kiilonga.

Ngame ondi li mengande lyohokwe yokumu hokwa mboka mu li aayambidhidhi yoshikundaneki shika, nondi na ondjuulukwe yokutsakanena nane moshikando tashi landula.