Victor Angula |

Ehangano lyedhina Diabetes Association of Namibia (DAN) ndyono tali kondjo opo li kalele po uuwanawa waavu yomukithi gwosuuka otali ti olya pumbwa opo oshigwana shi tseye kutya omukithi gwosuuka ohagu vulu okupangwa nuupu.

Unene ngaa uuyelele mbuka owa pumbiwa wu thike moshigwana sho esiku lyonena lyo14 Novemba olyo esiku lyaavu yosuuka muuyuni.

Sho a popi noshikundaneki shino shOmutumwa, Omundohotola Matthew Mojekwu, ngoka oye omuwiliki gwoDiabetes Association of Namibia, okwa ti ehangano lyawo olya pumbwa aantu yeli wayimine.

“Ehangano lyetu olya totelwe po momumvo 2005, noli na ngashingeyi oshitayi shimwe owala shoka shi li mOshakati. Ano otwa hala opo aantu ya tote iitayi moondolopa moka ye li,” Dr Mojekwu ta ti.

Dr Mojekwu okwa ti wo kutya ehangano olya kala lyapalamenwa komashongo, mwa kwatelwa eshongo enene ndyoka kutya omahangano goongeshefa omanene ngoka haga nduluka nokulanditha omiti dhokukondjitha omukithi gwosuuka oya kala inaya hala opo oshigwana shi uve kutya omukithi gwosuuka ohawu vulu okupangwa nuupu.

“Elalakano lyetu olyo oku uvitha ko aantu, opo ya longithe omikalo ndhoka tadhi aludha omuntu kuuvu wosuuka,” Dr Mojekwu ta ti. “Mupyamunene aantu yamwe inayeshi nyanyukilwa.”

Ihe okwa totha mo Omukokoli Dr Sam Nujoma kutya okwa kala oye omuyambidhidhi gwehangano omunene.

Dr Moj okwa ti aantu mboka ye li momikunda nayeshi uve ko kutya okwa kala ehangano lyaanuuvu womukithi gwosuuka, notaya vulu oku ninga iilyo.

Okwa ti wo kutya otaku ka ningwa iinyangadhalwa muule woshiwike shika moka aantu taya ka konakonwa oshali oku tala ngele omuntu oku na omukithi gwosuuka, e tapu kala wo omapukululo nkene omuntu wu na oku panga omukithi nguka ngele owu wu na.

Methano: Dr. Matthew Mojekwu.