Omusita Tarah Shalyefu okwa hogolululwa a ninge ishewe meya gwondoolopa Ongwediva uule woomwedhi 12 tadhi ya.

Kansela gwondoolopa ndjika meme Helaria Katonyala okwa hogololwa a kale omupevi meya gwaNgwediva, omanga kansela tate Fabian George a hogololwa a ninge omunashipundi gwewilikongundu (management committee).

Omahogololo oga ningwa nena mendiki lyomauliko giipindi mOngwediva, ga ningwa pawiliko lyamangestrata gwaShakati tate Elvis Mwilima Mwilima.

Mboka ya hogololwa pamwe naFabian George onga iilyo yewilikongundu oyo meme Naemi Amuthenu natate Jona Elago.

Sho a popi konima yehogololo lye, tate George okwa ti: “Otandi uvaneke kutya otatu kiitula mo twa mana mo mokulonga iilonga yehumokomeho lyondoolopa yetu. Ihe otatu pula eyambidhidho lyaakwashigwana yetu.

“Ano ongaakwashigwana inamu sa uunye oku konkola komiyelo dhoombelewa dhetu opo mu tu pe omayele nomagwedhelopo.”

Methano: Meya Tarah Shalyefu ta minike mangestrata Mwilima Mwilima konima yehogololo lye onga meya.