TB Joshua a hulitha

Ku Victor Angula |

Omumbisofi a simana muAfrika gwedhina TB Joshua okwa lopotwa a hulitha ohela momasiku 5 Juni 2021. Inashi yela natango kutya Joshua okwa hulithile megumbo nenge okoshipangelo.

Otaku tiwa okwa li a zi komagalikano kongeleka ye e ta shuna kegumbo esiku ndoka a ka uvika a hulitha; ihe kapu na natango uuyelele wothaathaa kutya okwa hulitha koshike.

Omusamane nguka Temitope Balogun Joshua, a tseyika nedhina TB Joshua, okwa li omusitagongalo omukwashigwana shaNigeria. Oye omutotipo nomuwiliki gwongeleka yedhina The Synagogue Church of All Nations (SCOAN) ndjoka ya kala tayi pititha omauvitho ge niinyengandunge tayi longwa mongeleka ye pakupitila moTV yedhina Emmanuel.

Aantu oyendji yuuyuni unene tuu Aayafrika mwa kwatelwa wo Aanamibia oyendji oya li aalanduli yaTB Joshua oku pitila moEmmanuel TV. Aantu mboka ye na omikithi dha kolonda osho wo oombepo dhoompwidhuli dha kukuta oya kala taya yi ya ka konge omakwatho kongeleka yaTB Joshua.

TB Joshua, a valwa momasiku 12 June 1963, a valelwa momukunda Ondo moNigeria, oye gumwe gwaasitagongalo ya itaalwa koyendji kutya okwa li ha hunganeke noku longa iinyengandunge. Otaku tiwa okwa hunganeka iiningwanima oyindji omanga inaayi ningwa.

Ihe mboka inaya itaala ko oonkondo dhe oya totha mo kutya TB Joshua okwa li a nyengwa oku hunganeka kutya etungo lyongeleka ye moka mwa li hamu yakulilwa aayenda ya za kiilongo otali ka gwa po, shoka sha ningilwe momumvo 2014, e tamu sile aantu ethele nasha.

TB Joshua ongaashi wo aaprofeti yuuyuni ayehe oya li wo ya nyengwa okuhunganeka kutya otaku ya omukithi omudhigu nomudhipagi ngoka gu li ko ngashiingeyi gwedhina Covid-19.

Methano: Oye Omumbisofi TB Joshua (ethano lya zi komalungula).

Advertisements