Advertisements

Uufuthi nawu hulithwe po

Ku Martin Negumbo |

Oshilongo shetu oshi li po tashi nana nondatu tashi etithwa kiinima oyindji mwa kwatelwa uufuthi.

Ano uufuthi owa nika oshiponga konkalo yoshigwana nokeliko lyoshilongo.

Oyendji sho taya kongo omaliko gawo nenge taya tungu oongeshefa dhawo opo ya kwathele oshigwana, opu na wo mboka inayeshi panda yo inaya hala oku ilongela ihe oya hala okuhupila miinima ya yakwa tashi pitile moku ikuthila noku yonagula omaliko goshilongo.

Ookalyamupombo yamwe ohaya teya omatungo opo ya ye meni ya ka yakemo shoka shi li mo, omanga yamwe otaya yugu komulungu gondjembo mpoka nokuli tapu vulu oku kanena oomwenyo dhoonakuninga iihakanwa.

Shika kashishi nande oshinima oshiwanawa oshoka otashi shololitha aanangeshefa sigo taya tameke ye na uumbanda etaya pata thilu oongeshefa dhawo.

Kakele kaashika omukalo nguka otagu shunitha wo oshilongo shetu monima oshoka iimaliwa ya yakwa ihayi shuna moshigwana nuupu ihe aayaki ohaya landa iiyendjitho yawo yondapo nokutunga omagumbo gawo yene.

Oyendji mboka haya longitha oonyala oonde ohaya ka iyadha ya mangwa po komiya dhashinana e taya taalele omageelo ga yaga kegonga ngaashi oku kala mondholongo ethimbo ele shoka hashi eta oluhepo nuupongo kaakwanezimo nomagumbo gawo.

Ano otandi indile opo oshigwana shi longithe omukalo goku indila shoka weshi pumbwa opo u pewe kumwene nenge kepangelo peha lyoku ikuthila nenge lyoku yuga.

Onkalo yuufuthi otayi ndjeke po onkalo yoluhepo nokwaahe na iilonga e tayi thindile pevi uuwanawa woshigwana gonomapipi tage ya otaga ka tsikila noku yaka. Onga omushangi otandi ka uva nawa uuna ti ka mona uufuthi wa shuna pevi moshilongo shetu e tatu longeleni kumwe.

– Martin Negumbo oye amushanga omukuluntu gOmutumwa mOshiwambo.