Advertisements

Elelo lyOndoolopa yaShakati pamwe nOshakati Premier Electric oya tameka iilonga yoku eta olusheno komalukalwa gomOshakati gedhina Onawa.

Onawa ndjoka oyo omukunda gu li moongamba dhondoolopa ndjika popepi nEhenye okwa tungwa omagumbo gopashinanena osho wo oopate, ihe aakalimo oya kala ashike ya tegelela ya etelwe olusheno opo ya vule wo okutumbulwa kutya oyo aakalimo yondoolopa yaShakati.

Nena opaala yotango oya dhikwa mOnawa, ndjoka tayi ka tamekitha iilonga yoku tula olusheno momukunda nguka.

Omukuluntuwiliki gwehangano hali gandja omayakulo golusheno mOshakati lyedhina Oshakati Premier Electric, tate Nelson Sheya, okwa ti iilonga yegandjo lyolusheno kaakwashigwana yomOnawa oya tameka ngashingeyi, notayi ka pula oshimaliwa shi thike poomiliona omulongo nayimwe.

Meya gwaShakati naye wo okwa koleka oohapu ndhika poshiithanene shoka pwa li wo Minista gwOondoolopa nEhumokomeho lyoKomikunda tate Erastus Uutoni.

Gavena gwaShana tate Elia Irimari naye wo opo a li.

“Ondemu pandula aakwashigwana yetu yomOnawa sho mwa kala mwi idhidhimika mwa tegelela tu mu etele olusheno,” Meya gwaShakati tate Leonard Hango ta ti.

“Kwateni nawa iikwamalusheno mbika tamu yi etelwa opo i kale po ethimbo ele tayi mu pe olusheno sigo okomapipi tage ya.”

Omikunda ndhoka wo dha tothwa mo tadhi ka mona olusheno mopolohalama ndjika ongaashi Oshandumbala, Othingo, Onendongo, nEmono.

Methano: Iilonga yolusheno oya tameka mOnawa.