Ohole kehe nayi kalekwe po
Ku Martin Negumbo /
Otashi vulika aaleshi yamwe ya kale taya ipula kutya omunyoli ota popi ohole yini po!
Uuna taku popiwa ohole otashi vulika yi kale yi na omafatululo ogendji ihe limwe lyomugo olyo ndi tali ti ohole oyo oku hokwa omuntu gwontumba nenge oshinima shontumba noku holola nkene weshi panda.
Ano mokuhola omuntu ohamu zi uuwanawa.
Omathimbo ogendji ohole oya kala tayi longithwa pambambo noya kala tayi holola uuhwapindi peha lyokuholola uuwanawa.
Aaleli yamwe oya kala noku popya kutya oye hole oshigwana ihe lwanima oshigwana ohayeshi ethele pevi peha yeshi ulukile kutya oyeshi hole nokushi ningila uuwanawa.
Omunyoli mpaka ota ti heke gumwe kala wu hole shoka wu hole, e toshi ningile uuwanawa ethimbo kehe. Nuundoka pwa holoka uuwinayi washa otashi ti ohole kayi po we.
Na unene otandi ukilile paagundjuka mboka ye li moohole dha vuka opo ya simanekathane peha lyoku ivundakanitha noku dhengathana osho wo oku hepekathana pamikalo dha yoolokathana.
Oto adha monena omumati nenge omukadhona e na aantu ye vule puyatatu ta ti ayehe okuya hole, ihe oha ndopa moku holola ohole ndjoka oshoka ohole ohayi endithwa kesimaneko. Nongele kapu na esimaneko ohole otayi tyuulile nuupu.
Aagundjuka mboka mu li moohole dho hwangalahwahwa otandi mu indile ngeyi opo mu lundulule oonkalo dha tya ngaaka pehulilo lyomumvo mpaka opo ayihe yi ka ende nawa petameko lyomumvo tagu ya.
Kaaleshi yoshikundaneki shika mboka mwa kala noku hepekwa kaaholike yeni pamukalo kehe gweku uvitha nayi, inamu yemata unene oshoka otandi mu pe ombili peha lyaamboka.
Ohole nayi kalekwe po e tayi nkondopekwa kaantu ayehe yaali mboka ye li mohole pwaa na ndjoolola kutya gumwe ashike ta kala e hole mukwawo. Na uuna ya nkondopala notayi ende nawa nayi topolelathanwe shi thike pamwe. Iikulu nayi hule po niipe nayi ka tameke momumvo twa taalela.
Mboka mwa ethiwa kwaamboka ya kala noku mu heka kutya oye mu hole inamu teka omukumo, natu ka tumbuleni tatu ti ‘omumvo omupe nomuntu omupe!!’
Kaaholi yOmutumwa ote ti ayihe nayi mu endele nawa e tatu puleni komeho tuu mba twa hila twa ya. Ondemu pandula sho mwa kala noku landula oshikundaneki shika.
Molwaashi dhokana ihadhi gogoka, nandi hulile manga mpaka monena. Tandimu halele okilismesa ya yambekwa nomumvo omupe gu na elago.
– Martin Negumbo oye omukuluntuwiliki gOmutumwa mOshiwambo. Ota kwatathanwa naye ko0813773399.
