Aantu otaya monika natango ye li momikweyo omile ta ya kongo ekwatho opo ya nyolithe uukalata wawo womakwatakanitho gopangodhi yopeke.
Nonando etumwalaka nelombwelo olya li lya piti konyala oomvula mbali dha yi kutya kehe gumwe ngoka e na ongodhi yopeke na ye a ka shangithe okakalata konomola ye opo ka kale inaka kuthwa mo mombepo, aantu natango otaya monika mboka opo ngashiingeyi ya hala okunyolitha uusima wawo.
Ehangano lyomayakulo gekwatakanitho paengodhi dhopeke, oMTC, osho wo galwe, oya popi kutya esiku 31 gaMaalitsa olyo tali kala esiku lyahugunina okushangitha uusima. Naangoka ine shi ninga ota ka papala owala ongodhi ye ya tetwa mo mombepo mesiku lyotango lyaApilili.
Nonando MTC okwa li a popi kutya konyala oopelesenda odhindji dhaantu odha nyolitha uusima wawo, ihe nena mugatatu gaApilili aantu otaya monika tuu natango ye li momikweyo.
Methano: Aantu oya menekela poombelewa dhaMTC mOshakati shokUuninginino, ye li momikweyo omile.
