Dohotola Kalumbi Shangula okwa li ohela a taamba pambelewa omashina gatatu ngoka haga opaleke nokupanga iitiyanathigo.
Dr. Shangula okwa li a taamba nolupandu omashina ngaka ga gandjwa kehanganongeshefa lyedhina Debmarine Namibia.
Omashina oga kotha oshimaliwa shi thike poN$1,5 million oku ga landa noku ga tula mo mOshipangelo shEpangelo shaShakati.
Dr. Shangula okwa ti okwa pandula unene komakwatho ngaka, oshoka otashi etitha omayakulo guunamiti popepi noshigwana.
Dr. Shangula ngoka e li oye Minista gUuhaku nUukalinawa wOshigwana okwa ti wo kutya muule wethimbo efupi oshipangelo shaShakati otashi ka kala shi na endiki lyokupanga aanuuvu yiitiyanathigo.
Sestela Ester Eelu ngoka oye omukuluntu gwoshitopolwa shomayakulo gaavu yiitiyanathigo moshipangelo shaShakati okwa li a popi pethimbo Dr. Shangula nameme Stella Ipinge gwoDebmarine Namibia osho wo yalwe mboka ya li ya gongala mokangulu kokuyakula aavu yiitiyanathigo, ta ti oye li taya yakula aavu yaali.
Gumwe oye tate Eino Ekandjo, nomukwawo otate Jacob Nengushe.
Sestela Eelu okwa ti omuvu oha kala keshina lyokupanga iitiyanathigo uule woowili ne.
Methano: Sestela Eelu ta popi nkene omashina goku panga uuvu wiitiyanathigo haga longo.
