Omuwiliki gwopamuthigululwakalo gwElelo lyAaherero ngoka haku tiwa Ombara Otjitambi Omuadvokate Vekuii Rukoro okwa hulitha ongula yonena.

Etumwalaka ndika lyoluhodhi olya tseyithwa kuProfessa Mutjinde Katjiua ngoka oye Amushanga Omukuluntu mOmbelewa  yOmbara Otjitambi.

Katjiua okwa nyolele omukanda kOmbelewa yOmupresidende Hage Geingob temu tseyithile onkundana ndjika yoluhodhi.

Nakusa Rukoro otaku tiwa okwa li a monika ombuto yoKorona omasiku owala omashona ga piti.

Rukoro okwa li oye omuwiliki gwaamboka taya kondjitha oshipotha shoku pula Ndowishi opo a gandje ombili e ta futu molwa omadhipago gakenyeneka ga ningililwe omuhoko gwAaherero nogwAanama pethimbo lyomimvo 1904 sigo 1908.

Rukoro okwa li a ningwa omukwaniilwa gwAaherero konima yeso lyaangoka a li Ombara Otjitambi Kuaima Riruako mo2014.

Methano: Ombara Otjitambi Vekuii Rukoro (ethano kuNBC).