Gavena gwOshitopolwa shaHangwena tate Sebastian Haitota yaKalola kaNdeitunga, okwa li a pandula Kakukutu kOmatanga goPolisi yaNamibia Leftenanda Generala Joseph Shikongo sho a li a patulula oshitaasi oshipe shopolisi mOkatyali.
Shino osha li sha ningwa oshiwike sha piti, sho oshitaasi shotango mOshikandjohogololo Okatyali sha patululwa.
Okatyali oka tseyika koyendji molwa Kansela gwako tate Joseph Mupetami, ngoka a tseyika onga omupiya gwoshigwana.
Poshiithanene opwa li pwa kala wo Omukwaniilwa gwOshitunda shOndonga Tate Fillemon Nangolo Shuumbwa.
“One aanelago, oku kala mu na osasiona yi li popepi nane,” Gavena Ndeitunga osho a ti.
“Oshilongo shetu oshinene, yo ompumbwe [yokutunga] oyi vule iiniwe yetu. Ihe otatu tungu kashona nakashona, ihe onompangela kutya oshinakugwanithwa shepangelo okweeta omayakulo koshigwana oga gwanithwa po.”
Tate Ndeitunga okwa ti wo: “Omukuluntu gwopolisi otandi ku kombo kombunda sho to tsikile noku tula miilonga oompangela dhaamboka yeku tetekela moshipundi.
“Osho oshinima oshiwanawa oku tungila komakankameno ngoka ga tulwa po kwaamboka wa tetekele.
“Ano sho tu weteni iinima tayi ende nawa mOndonga muka omolwashoka omukwaniilwa oha longo shi ikwatelela komakankameno ngoka a adha ga tulwa po kaakwaniilwa ye mu tetekela.”
Methano: Omukwaniilwa gwaNdonga Tate Fillemon Nangolo Shuumbwa pamwe naKakukutu-kwali gwEtanga lyoPolisi yaNamibia Leftenanda Generala Sebastian Ndeitunga ngoka ngashingeyi oye Gavena gwaHangwena taya ende yu uka poshitaasi shopolisi yaKatyali.
