Ongundu yopolotika yedhina Affirmative Repositioning (AR) oya ti Frederick Shitana oye gumwe gwomwaamboka taya ka kalela po ongundu mOmutumba gwoPashigwana (Opaliamende) ngoka tagu ganithilwa miilonga momasiku 20 gaMaalitsa.
Shitana, ngoka a tseyika nedhina Letenanda Shitana, okwa li ineshi pondola oku mona oshipundi mopaliamende konima sho ongundu yawo ya li ya zi mo ashike niipundi ihamano konima yiizemo yomahogololo gopashigwana ga ningilwe mo27 yaNovemba gwo2024.
Momusholondondo gwongundu yawo okwa li e li puutihetatu.
Ihe AR okwa popi momushangwa nena ta ti iilyo imwe mbyoka yali ya mono iipundi, ngaashi Maitjituavi Kavetu ngoka momusholondondo a li puutiyali, naIlse Keiter ngoka a li puutitatu, itayi ka kutha we ompito ndjoka yiipundi yomopaliamende ihe mbaka otaya ka kala ye li ashike miipundi yElelo lyOshilando shaVenduka.
Shika osha gandja ompito opo Shitana a mone oshipundi mopaliamende.
AR okwa popi momushangwa ta ti Shitana, ngoka e li omuhikingalo, ota ka longa e li oshilyo shomutumba gwopashigwana ta kondjitha pu ningwe omalunduluko moshikondo shokutuma omawi mombepo opo aahikingalo ya mone omauwanawa ngoka yega pumbwa.
Tuhafeni Kalola, ngoka momusholondondo gwongundu a li puutiheyali, naye ota ka kutha wo oshipundi mOmutumba gwoPashigwana pamwe naShitana.
Omalunduluko ngaka oge eta opo ongundu yoAR yi kale naakaleli po mbaka: Job Amupanda, Ester Haikola-Sakaria, George Kambala, Vaino Hangula, Tuhafeni Kalola, naFrederick Shitana.
Methano: Okuza kolumoho oyo Absalom Itamalo, Martin Olembe Antindi, naFrederick Lieutenant Shitana.
