Aakalimo yOshitopolwa shaShana ye thike pethele limwe oya li ya gongala oku tyapula nokudhana esimano lyoohedhi dhaakulu yonale nomithigululwakalo.
Nuumvo momasiku 15 sigo 21 Sepetemba oshilongo Namibia osha dhimbulukwa oohedhi dhaakulu yonale notema tayi ti “Bahindi Balambilye Chizo Chetu” shoka shi li melaka lyOshilozi, notashi ti “Aahumbati yonyika yoohedhi dhetu”.
Mesiku 19 lyaSepetemba Aashana oya gongala mOshakati, pamwe naGavena gwaShana tate Hofni Ipinge, mpoka ya pulakene kiipopiwa noku tala iidhano yopamuthigululwakalo.
Mokati kaapopi omwa kwatelwa meme Pauline Shapumba ngoka e li omukuluntu gwoshikondo shelongo, uunkulungu, aagundjuka, omaudhano, noohedhi mOshana.
Shapumba okwa ti oshiwike shika shokudhana nokudhimbuluka oohedhi niithigululwanima osha simana oshoka oku kwatela po oohedhi oko oku kwatela po omwenyo gwoshigwana.
Gavena gwaShana tate Hofni Ipinge okwa ti aantu naya longe uunona momagumbo kombinga yesimano lyoohedhi, oshoka oshigwana kashi na oohedhi osha fa omuti kagu na omidhi.
Methano: tate Hofni Ipinge
