Komanda gwOpolisi yOshitopolwa shaShana, Komishina Lungameni Sakaria okwa ti yo kaye li ompinge noongeleka dhoshiveva ihe shoka ya hala ombili nelandulathano moshigwana.
Ndhika Komishina Sakaria okwedhi popi poshiithanene shaGavena gwOshitopolwa Oshana, tate Hofni Iipinge, mpoka gavena a li a tongomona iinima mbyoka ya pondolwa po pethimbo lyomasiku ethele gotango e li mombelewa yuugavena woshitopolwa.
Sakaria okwa ti ekotampango lyoshilongo olya gandja uuthemba kaantu ayehe opo ya kale moongeleka dhawo moka ya hala.
“Ihe aantu yamwe oya itaala kutya onga opolisi inatu hala oongeleka dhoshiveva. Aawe, hasho nando,” Sakaria ta ti.
“Ngaashi naaanaa Gavena eshi popya, aantu yoongeleka dhimwe otaya eta evundakano moshigwana. Tse otwa hala oku tula po ashike ombili nelandulathano.
“Inatu hala omuntu toyi moshigwana nongeleka, nokonima aakulupe itaya popi we naanonakadhona yawo.”
Omukuluntu gwopolisi okwa gandja oshiholelwa shoshiningwanima sha ningwa kOmatando, hoka omupolofeti gwongeleka a li a fula okahima mondunda yi li megumbo, nokwa lombwele aanegumbo kutya okwa pumbwa iikombo iyali opo a vule oku ninga efikiloyambo lyombinzi a opaleke megumbo mo. Omupolofeti nguka okwa li wo a pula a futwe oshimaliwa.
“Otwa dhengelwa ongodhi, tu ka tale kutya oshike shi li hoka. Otwa ka mona kutya nani kahima oyo ye ya naye, shaashi otwe ke mu adha megumbo lyawo.
“Niikombo mbyoka ya ti otaye yi ningi po efikiloyambo, oya ya nayo yeke ilya po.
“Sho tatu popi ngeyi, aantu mbono oye li mondholongo, ya patululilwa iipotha.
“Odho nee oongeleka twa hala moshigwana ndhono? Aaye.”
Sakaria okwa gwedha ko ta ti oongeleka ndhoka dhi li melandulathano ewanawa odha manguluka oku ninga omalongelokalunga gawo.
“Oongeleka tadhi galikana, taya longele Omuwa, ihe hamakudhilo noku nuka sigo opombali yokoongulasha. Tse katu na ondjoolola, kutya omakudhilo otaga zi mobaa nenge omongeleka, ekudhilo ekudhilo ashike, notatu kutha onkatu tuli ngambeke.
“Oongeleka odha pitikwa adhihe ndhoka tadhi galikanene aantu, notaya ningi omalongelokalunga ge li nawa, nokuza mpono aantu otaya piti mo taya yi komagumbo. Itaya lombwele aantu kutya oye na oodemoni, oya liwa kulye, nenge oombiga dhawo odhi na iiluli naye dhi tatagule po, aaye shono itatu shi pitike nande moshigwana.”
Methano: Komanda gwOpolisi yaShana Komishina Lungameni Sakaria ta kuthile ko oshigwana kombinga yoongeleka.
