Elelo lyOshitopolwa shaShana olya kuutumba nena momutumba gwalyo omutiyali okuza sho lya hogololwa kehulilo lyomumvo gwa yi.
Moshigongi shino omwa li konyala ookansela adhihe dhoshitopolwa, kakele kukansela gwoshikandjohogololo shaKatjali tate Fillipus Johannes ngoka ina holoka.
Omunambelewa omukuluntu gwelelo ndika lyaShana meme Theopolina Hamutumua okwa ti otashi shiwa tate Johannes inaholoka molwa onkundana yoluhodhi ndjoka ya li ya thiki ya guma kansela Johannes.
Omunashipundi gwElelo ndika lyaShana tate Kaushiweni Abraham okwa kuutumbike oshigongi, e tashi kundathana iinima oyindji ya pamba eyambulopo lyoshitopolwa.
Mwaambyoka ya kundathanwa omwa kwatelwa aanangeshefa yaali mboka ya gandja omathaneko nkene haya gandja omayakulo koshigwana, noya indile elelo opo li longele kumwe nayo.
Tango ehangano lyedhina MT Hydrogen Engineering olyo lya pewa ompito e tali popi nkene uushina walyo woku gandja olusheno hawu longo.
Omugundjuka Timotheus Nangombe okwa gandja wo uuyelele nkene ehangano lyawo hali gandja omayakulo gomakwatathano ngaashi goku tuma uutumwalaka pangodhi kaantu oyendji tashi ningwa oshikando shimwe.
Nangombe okwa ti omayakulo ngaka omawanawa okulongithwa andola kookansela ngele ya hala oku tuma omauyelele kaakwashigwana yiikandjohogololo yawo.
Oshigongi osha kundathana wo eindilo lyElelo lyoPamuthigululwakalo gUukwambi ndyoka lya hala oku mina evi momukunda Emono moshikandjohogololo Okatana.
Elelo lyoPamuthigululwakalo gUukwanyama nalyo olya li wo lya pewa ompito li gandje uuyelele noku yamukula omapulo kombinga yeindilo lyalyo lyoku mina evi momukunda gu li moshikandjohogololo shaNgwediva.
Shimwe shomwaambyoka ya kundathanwa ongashi wo uupyakadhi womeya gokomikunda noondama dhevi ndhoka inadhi pwa oku fulwa.
Methano: Elelo lyaShana tali kundathana momutumba gwa ningilwa mOshakati.
