Ehangano hali kondolola iilonga yomayakulo gomakwatakanitho noyoku-andjaganeka omauyelele (CRAN) olya li lya kuutumba noMTC okukundathana omakemo gaakwashigwana taya ti oodata dhawo ohadhi lika ko yaahe shi kutya ongiini.
Oonkundathana odha li dha kwatela mo wo omakemo ge nasha nokwahagandja uuyelele wa yela nkene iifuta yomakwatathano hayi ningwa, osho wo omakemo ge nasha nongushu yomakwatathano.
Omuwiliki gwaCRAN meme Emilia Nghikembua okwa ti, “Oodata tadhi lika ko tashi limbilike osho shimwe shi li ekemo enene lyaalongithi yomayakulo gomakwatathano. Ano otashi etitha ekanitho lyeinekelo mutse aagandji yomayakulo ngaka.
“CRAN oku na oshinakugwanitha opo a tulithe po omilandu dha yela nkene iifuta yomayakulo gomakwatathano hayi ningwa.
“Otashi pumbwa oonkundathana lela opo ku adhike ekandulo po lyomikundu ndhika. Ano oonkundatha dhetu naMTC oko dha li dhiikwatelela hoka.”
Nghikembua okwa ti otaku ka ningwa omakonakono nomalolelo nkene oodata dhaantu hadhi kana pwaahe na etompelo.
Okwa ti kutya MTC okwa lombwelwa wo opo a tameke niikonga yoku uvitha ko oshigwana kombinga yiilonga yomakwatathano, osho wo nkene oodata hadhi longo, niinima mbyoka hayi nwetha mo ongushu yomakwatathano.
“Elongo ndika olya simana opo aalongithi yomakwatathano ya tseye nkene ye na okukaleka po oodata dhawo osho wo okushunitha pevi iifuta yomakwatathano.”
Methano: Omuwiliki gwaCRAN meme Emilia Nghikembua.
