KuKleopas Nghikefelwa (Efatululo kuVictor Angula)|
Omolwashike Dr. Martin Rautanen (Tate Nakambale), omukokoli gwetumo lyAasoomi moNamibia, e li emanya lyokolonela mondjokonona yaNamibia, unene ngaa mesiku lyevalo lye ndika 10 gaNovemba 2026?
Kaatalelipo naakongi yomauthiga gomuthigululwakalo mboka taya ende monooli yaNamibia pethimbo lyomafudho gaDesemba, oMusiuma yaNakambale oyo yimwe yomahala gokutalelwa po.
Mpano otapu landula omatompelo nkene edhina lyaNakambale lya simana nomuntu oto mono shike ngele wa talele po ehala ndika lyopandjokonona:
Uuthiga wEdhina lyaTate Nakambale tawu kalelele moNamibia
Iilonga ya longwa kuDr Martin Rautanen methimbo lyomukokomoko gwomimvo 56 (okuza 1870 sigo 1926) moshinyanga shaLukonda oya yala ekankameno lyomilanduputuko, nokunwetha mo elaka, osho wo uukwambepo woshigwana shAawambo.
Etulopo lyOmunyolelo gwElaka: Sho a lundululile Ombiimbeli mOshindonga (Etestamendi Epe mo1903, nEtestamendi Ekulu mo1920), okwa tula po emunyolelo gwelaka lyOshindonga, nokwa pala ondjila yaalongi yontseyoyokulesha nokunyola osho wo elongo lyopashinanena.
Iigwana ya yi mumwe: Oshilukadhina she, “Nakambale”, (a lukwa ngawo kaakwashigwana molwa embale a li e hole okuli zala omolwomutenya) otashi ulike nkene a li i itula mo moshigwana shAawambo. Uuwanawa wiilonga ye owa ningi opo a kale gumwe edhina lye “Martina” nenge “Meitina” li lukilwe uunona wuumati moshigwana shAawambo sigo okonena ndji.
Etungopo lyoPambepo nIinyanga: Okwa tunga ongeleka yotango monooli yaNamibia momumvo 1889 nokwa li gumwe gwaamboka ya li ya longekidha eyapulo lyaasita yotango aapopi yelaka lyOshiwambo mo1925, ano a yala ekankameno lyongeleka yEvaangeli paLuteri moNamibia (ELCIN).
Enyolo lyUunongononi: Kakele kiilonga ye yetumo, Rautanen okwa longo pamwe naanongononi yokiilongo mokunyola uunongo wontseyombepo, omihoko niimeno yoshitopolwa.
Nomolwaashono wu na ku talela po Omusiuma yaNakambale pethimbo lyefudho lyoye
Yi li popepi nOngeleka yaELCIN mOlukonda, moongamba dhondoolopa yaNiipa, Omusiuma yaNakambale kayi shi owala ehala mwa pungulwa iikwandjokonona – ihe ehala li li lya longekidhwa nolyiilongekidha aluhe okutaamba aayenda naatalelipo ongele aanegumbo, ookuume, nenge oongundu dhaanasikola:
Egumbo lyEtumo lyoPandjokonona: Enda mo metungo lyegumbo lyetumo osho wo etungo lyongeleka ga tungwa mo1889 ihe oga kwatwa nawa noge li monkalo yi li nawa sigo onena wu mone euvoko lyomuule osho wo ekwatathano talikalelele pokati kaSoomi naNamibia.
Oongulu dhAayenda Oombwanawa: Ehala oli na oNakambale Lodge, tayi gandja oondunda dhaayenda oombwanawa oku kala mo, osho wo ootenda dhokulala pondje pu na okambepo okawanawa nomutalelo omwaanawa pethimbo lyaDesemba nenge momahuliloshiwike.
Okuthuwapo nOkulya: Tyapula uuwanawa womokandama kokumbwinda, ombaa ya pitikwa okulanditha iikunwa, oondunda dhiigongi, osho wo ondunda yiikulya ya tseyika nawa molwa iikulya yomoshitopolwa pamwe nomasiga gopondje gopizza.
Longekidha Etalelopo lyoye & Uuyelele Otawu Monika
Ngele oto longekidha olweendo monooli yaNamibia, oto vulu oku kwatathana naaniilonga yehala ndika nenge omunyoli gwoshinyolwa shika opo ye ku kwathe:
Okubuukinga moMusiuma nomoLodja (Meme Magdalena Kaanante): Ongodhi yopeke: +264 81 249 3108 (or +264 81 249 310), Yokopaala: +264 65 245 668 (or +264 65 240 472)
Oemaila: olukonda.museum@elcin.org.na / nakambale@scadvlodges.com
Buukinga etalelopo wu pewe omuntu ta ende nangoye te ku fatululile kehe shimwe mehala ndika lyopandjokonona (Tate Kleopas Nghikefelwa – Omutakamithi gwiikwamusiuma): Ongodhi yopeke: +264 81 275 5616, Email: kleasn@gmail.com.
