Martin Negumbo /
Elelo lyOndoolopa yaNdangwa olyali lya unganeke oshikonga shoku opaleka ondoolopa osho wo komalukanda ga kundukidha Ondangwa.
Enenelalakano lyoshikonga shika oku kaleka ondoolopa ya yela noku kaleka po uuyogoki moshigwana.
Aaniilonga yalwe yomelelo lyondoolopa oyo tuu ndjika oya li ya kutha ombinga pamwe naakalimo yomondoolopa oshowo aanasikola nayalwe mboka haya yambuka komalukanda gopopepi moku opaleka ondoolopa ndjika.
Oosikola osho wo iikondo yilwe nomalukanda galwe ogali ga ningi omuhanga opo ga kwathele elelo moku opaleka noku nyatulula ondoolopa.
Moku opaleka ondoolopa ndjika oku toola iiyagaya mbyoka hayi kala ya nyateka ondoolopa oshali shimwe shomwaambyoka yali tayi dhana onkandangala onene moku opaleka huka.
Elelo lyondoolopa olyali lya longekidhila iikondo mbyoka yoopaleka nawa omapapa gawo opo ye ga pewe konima yoku opaleka.
Ethigathano lyoosikola olyali lya kwashipalekwa kombaanga yoBank Windhoek mekwatelo komeho lyomukuluntu gombaanga ndjoka Gennei Namene.
Oosikola dhoondondo dhopevi odha kutha ombinga meyopaleko nodha pewa omasindano, ongaashi Blessing Primary School okwa pewa N$1,000, omanga Oshitayi Primary School oN$1,500, nOluno Primary School ndjokwa ye shi enditha nawa ya pewa N$2,500.
Kakele koosikola dhopevi oosekundosikola ndatu nadho odha li dha sindana ngeyi, Olukolo Senior Secondary School N$1,000, Andimba Senior Secondary School N$1,500, naNangolo Senior Secondary School okwa mono N$2,000.
Kakele kwaashika omahangano ngoka ga kwashipaleka oshikonga shika miinima ya yoolokathana opo oshikonga shika shi ende nawa oga li wo ga pewa omakopo goshingoli.
Omakopi ngoka otaga kala haga kondjelwa omumvo kehe.
Oombaanga ndatu dha kwashilipaleka nodha yambidhidha moku opaleka huka odho FNB, Standard Bank osho wo Bank Windhoek. Iikondo yepangelo ngaashi shetanga lyegameno osho wo oshikondo shezulonkalo shomOndangwa nayo mbaka oya pewa omakopi.
Oongeshefa dhomanwino ndatu kwandhindhilikwa dha yela nawa mondoolopa odha pewa oonzapo dhoka tadhi ya pitike ya landithe kaapu na oku fendela notadhi ka kusha omumvo tagu ya. Odho Saaraevo Bar, Melody Bar naBuggati Bar.
Ethigathano ndika lyoongeshefa dhomalovu olya kwashilipalekwa kongeshefa yedhina Young Life.
Elelo lyondoolopa olya pandula unene noonkondo omahangano agehe ga yambidhidha moku opaleka huka naashoka ge na po.
Elelo olya holola wo kutya ando omahangano ngaka ogali inaaga yambidhidha ando otashi vulika elelo lya ndopa moku opaleka ondoolopa ayihe pawu lyolyene.
Aanangeshefa yomOndangwa mboka ya yambidhidha niikunwa osho wo iikulya nomakwatho gopashimaliwa oya pandulwa wo unene kelelo.
Oshikonga shoku opaleka otashi yambula po uundjolowele waakalimo yomondoolopa uuna ondoolopa tayi kala ya yela nawa.
Methano: Yamwe mboka ya kutha ombinga moshikonga shokwoopaleka ondoolopa yaNdangwa.
