Iilonga yoku topola openzela yaakulupe oya tameka ngashiingeyi tayi longwa po kuNamposta konima sho ya kala oomvula odhindji tayi longwa kehangano lyedhina Epupa Investment.
Namposta okwa tameka ohela ta gandja openzela okupitila miitayi ye yoopoosa oshilongo ashihe.
Ihe poopoosa opwa kala omikweyo omile.
Ethano ndika otali ulike aantu ya hala omayakulo gaNamposta pokapoosa kopoSpar mOshakati.
Omupopiliko gwaNamposta tate Gladwin Groenewald okwa popi momushangwa ta ti oye ilongela ko komalolelo ga ningilwe oshiwike sha za ko goku tala ngele otaya vulu ngaa shili okutopola openzela.
Openzela yomomikunda otayi ka gandjwa okutameka nena esiku 14 Kotoba.
“Omahala mpoka tapu ka gandjwa openzela otaga ka tseyithwa mooradio osho wo komapandja getu gopaungomba,” Groenewald ta ti.
