Ehangano hali longekidha omahogololo moNamibia, oElectoral Commission of Namibia (ECN) otali ti kutya olye ilongekidha nawa notali ka enditha nuukeka omahogololo ngoka taga ningwa mongula oshilongo ashihe.
Aanamibia otaya hogolola aaleli yawo momasiku 26 Novemba 2025, mboya taye ke ya kalela po miipundi yuukansela wiitopolwa osho wo uukansela woondoolopa.
Omupopiliko gwoECN tate De Wet Siluka okwa ti kutya yo oye ilongekidha nawa niinima ayihe oyi li melandulathano.
“Kombinga yiiyenditho, oECN otayi ka longitha oohauto dhi li 5300 oshilongo ashihe,” Siluka ta ti.
“Ano kombinga yiilongitho, ECN okwa mona nale omayambidhidho okuza moshigwana giinima ngaashi oohauto, uundjeneleta wolusheno, ootenda, iipundi niitaafula mbyoka ya gwedha pwaambyoka ECN e na nale.
“Naishewe, oECN oya mona omandhakandhaka nuumbautu okuza kUuministili wEgameno nIilonga yOonakulwa oku fala aanambelewa yomahogololo komahala ngoka ga nika efundja nenge koondundu ngaashi moKunene noZambezi.”
ECN okwa tula po wo omalongekidho pamwe nopolisi opo ku kalekwe po ombili, engungumano, egameno nelandulathano pethimbo lyomahogololo osho wo pomahala gomahogololo.
“Kehe pehala lyomahogololo otapu ka kala aapolisi yaali,” Siluka ta ti.
Methano: Aanambelewa yaECN osho wo aakalelipo yoongundu dhopolitika, pamwe naapolisi, taya konakona oombapila dhomahogololo.
