kuMartin Negumbo/
Penda naMbonzi oyali ya lumbu kohambo yomusamane Katongo kOnalusheshete hoka ya lumbu ko omimvo hamano taya tonatele iimuna noku ka umba uuyamakuti wawo uuna ya mono okampito.
Molwaashoka Penda okwali omukongo okwali e hole okuthiga Mbonzi mohambo manga ta ka tidha uulimba we nuupundja oshoka Mbonzi okwali e hole okulya lela nomohambo kehole kuzamo ya ye namukwawo kuukongo. (Yemwene Mbonzi momutse omwali ngaa inaamu gwana nawa.)
Nonando Penda heya ngaa a yaha sha, omasiku gamwe oheya ngaa ta hokololele mukwawo kutya okwa mona iihuna, ihe omulumentu nguka e hole sha tonywa omulungu iheshi uvu ko kutya ongiini omuntu te ya oonyala dhowala uuna a mona iihuna.
Esiku limwe Penda okwe ya mohambo okatango takaningine ihe kuukongo inaza ko nasha, e ta lombwele mumwayina kutya nonena okwa mona iihuna; ihe Mbonzi okwa tala mevi a geya e ta ti: “Oshike wu li ngawo mentu gwameme, kehesiku oho lile owala iihuna yoye hoka e toya wa mana po? Omolwashike iho etelele iihuna kohambo tu lye atuhe?”
Penda okwiimemeha owala e tayi u uka poshinyanga shawo ya ka lye uulalelo wawo womahini. Poshinyanga Mbonzi okwa tsikile ko natango ta ti: “Ngula ito thigi ndje po, wu fale ndje tuu mpa hapu kala iihuna mwameme gwandje.”
Esiku lya landula, pethimbo lyoshitumbetango aamati oya yi moshiheke ya ka tale ngele taya mono sha shokupona, nonando Penda e na ngaa elalakano opo a fale Mbonzi mpa hapu kala iihuna mbi iinene oshoka Mbonzi okwa kala ta pulapula mukwawo ngele iihuna iitoye lela yi vule ekonkola.
Aamentu mbaka oya thiki po pomano gamwe mpoka pwali hapu kala oongwe, ihe manga Mbonzi inaa mana epulo lye a pule kutya iihuna ano ohayi kala oyindji lela? Penda ongohela a li po konima sho a dhimbulula kutya otaku zi oshipandi shoombidhi.
Mbonzi sho a ka tala konima oku li mokati koombidhi. Sho a nuka mpoka ye te ikanyuna okonyala etako limwe lya lathwa ko kombidhi yimwe ndjoka ya li tayi endelele. Omumati okwa ka tondokela meno limwe lyomunkono moka oombidhi inadhi vula oku mu landulila mo, ihe omwa adhika mu na ongwe yimwe ndjoka yemu palutha nuutati e tewu ekelehi.
Mbonzi okwa dhenge ompadhi ketako sigo omohambo. Okwa li ta monika a pogonyoka ye ta zi ombinzi shimwe to nyengwa okushi hokolola. Okwa adha Penda a thika nale mohambo.
“Taa, iihuna weyi mono iye ngiika shimati?” Penda ta ti.
“Ndeyi mono, ndeyi mono iihuna tate! Itandi shuna ko we, itandi shuna ko!”
Ano kotoka, iihuna ihayi liwa. Natu puleni nawa manga inatu dhiladhila epunda.
