Epangelo okupitila mUuministeli wIinima Yomeni (Home Affairs) olya indile aakwashigwana opo ya ka tale ko uumutse wawo mboka wa ninga owundji koombelewa dhokuthanekelwa uumutse oshilongo ashihe.
Omushangwa gwa pitithwa kUuministeli wIinima Yomeni noYokoongamba otawu ti oondokumende dhuumutse dhi thike pomayuvi omilongo ntano nalimwe (51,000) odhi li miipakete kiitopolwa hoka aantu ya li ya thanekelwa.
“Uuministeli owa lulilwa sho aantu itaya yi ya ka pewe uumutse wawo. Ano Uuministeli otawu indile aantu ayehe mboka ya thanekwa ndele inaya mona uumutse opo ya ye ya ka pewe uumutse wawo.”
Uuministeli owa ti wo otaku yiwa momalweendo pokati komasiku 17 Febuluali sigo 6 Maalitsa 2020 oku fala uumutse kIikandjohogololo ayihe. Omasiku goku thika koombelewa dhookansela dhiikandjohogololo oga gandjwa nale koombelewa dhooGavena.
“Okamutse koye oko ondokumende yoye ya simana nowa pumbwa oku kala nayo osho wo onzapo yevalo e toyi pungula nawa,” omushangwa osho wa ti ngawo.
Sho a pulwa pangodhi omupopiliko gUuministeli wIikwameni tate Sakeus Kadhikwa okwa ti aantu sho inaya ka tala ko uumutse wawo ngiika omolwa omatompelo gaali.
“Lyotango okutya aantu oyendji inaya tseya kutya uumutse wawo owe ya. Noshikwawo ngiika aantu yamwe mboka uutse wawo inawu ilwa ko oya hula ko.
“Ano otatu kambadhala tu mone kutya uumutse mboka ooyene yawo ya hula ko oyeni,” Kadhikwa ta ti ngawo.
Kadhikwa okwa ti ishewe kutya otaya kwashilipaleke kutya uumutse itawu kuthwa ko kaantu mboka hayo ooyene yawo.
