Shaa ngoka ta kambadhala nomukumo oye ota sindana. Ihe ngoka ta si uunye nota sholola oye ta ndopa.

My Nigga Get Rich oye gumwe gomaahikingalo Aanamibia mboka ya kala taya kambadhala noonkondo opo ya ulike oshitalendi shawo shoku imba e taya ilikolele mo oshimaliwa. Okwa kala ta imbi oongalo dholudhi lwoRap/Hip Hop.

Ihe inashi kala oshipu oshoka Get Rich haye naanaa omuwanawa melaka lyOshiingilisa.

Nando a kala ta shekwa nota yolwa kaanandumbo Get Rich ina sholola.

Ngashingeyi Get Rich ota monika ta li iiyimati yomukumo nomatokolo ngoka a kala e ga na.

Nena ehangano lyongeshefa ndyoka hali tsu uusila wepungu lyedhina Namib Mills ota li longitha Get Rich miinyangadhalwa yokupolomouta ethigathano lyokusindana oshimaliwa lyo“Top Score Get Money Get Rich.”

Shaa ngoka ta landa okashako kuusila woTop Score ko10kg nenge 5kg ota vulu oku ya moshihogololitho a sindane oshimaliwa shoN$30,000 nenge N$20,000 nenge N$10,000.

Ethigathano ndika ota li ka hula muSepetemba 2020.

Nonando kapu na uuyelele kutya Get Rich okwa futwa ingapi kuNamib Mills, shimwe sha yela osho shoka kutya wu kondja wu sindana ngaa sikulimwe.

METHANO: Oye My Nigga Get Rich ta polomouta oTop Score.