Ombaanga yEhumokomeho yaNamibia (DBN) oya gandja omikuli kaanangeshefa aagundjuka dhi thike pongushu yoshimaliwa shoomiliona N$149.4 moshikako shomumvo 2019 sigo 2020.
Ndhika odha popiwa komugandjimulombo gwombaanga ndjika meme Di-Anna Grobler.
Kumwe omikuli ndhoka dha li dha gandjwa kaagundjuka momukokomoko gwoomvula okuza 2010 sigo 2020 odhi thike pobiliona yimwe oshinkwanu yimwe.
“Omikuli dhaanyasha odha topolelwa oshilongo ashihe kakele kiitopolwa shaKunene, shaOmaheke, naZambezi,” meme Grobler ta ti ngawo.
“Oshimaliwa oshindji shomikuli osha yi ko//Kharas (N$53.9 miliona) nOshana ngoka a mono oomiliona 26.4. Oyendji mboka ya mono omikuli oye li miilonga yokutunga osho wo okulonga oopate.
“Omikuli ndhoka dha li dha gandjwa odhe etitha po oompito dhiilonga dhi li 563, ndhoka dhomudho 291 odho oompito dhiilonga tayi kalelele.”
Kepulo kutya omolwashike aagundjuka mboka ya za momagumbo gahepa ihaya talika ko ya pewe omikuli Grobler okwa yamukula ta ti:
“Ombaanga yEhumokomeho ihayi finyafinya yi tale kutya omuindili gomukuli okwa za megumbo lya tya ngiini na ihayi ningi okayoya kaaindili yomikuli mboka ye na iiyemo iishona.
“Ombaanga ohayi gandja ashike omikuli kushaangoka a gwanitha po iipumbiwa nota ulike kutya ongeshefa ye otayi ke sheenditha nawa.”
Grobler okwa ti ishewe kutya ombaanga yawo oye eta po wo omulandu gwoku gandja omikuli kaagundjuka mboka ye na uulongelwe wontumba osho wo mboka ye na uunongo wiilonga yokomake.
“Nokugwedha kwaashono nosho wo komilandu ndhoka dha kala po nale dhegandjo lyomikuli kaanyasha, ombaanga oya dheula noku gandja oshimaliwa koongeshefa dhaagundjuka 121 dhi li miikandjohogololo ayihe yoshilongo omumvo gwa zi ko.”
Kepulo kutya omolwashike aagundjuka ya pewa owala okamaliwa okashona komikuli ke thike poopelesenda 7,6 momukokomoko gwoomvula omulongo, Grobler okwa yamukula a ti:
“Ngele aanangeshefa aagundjuka oya ningi omaindilo gomikuli, ihe oongeshefa dhawo itadhi ulike tadhi ka mona iiyemo iiwanawa, ano ombaanga itayi ya pe omikuli.
“Ombaanga oyi lile po uuwanawa woshigwana noitayi gandja omukuli ngele sho tashi ke ya pokushunitha ko omukuli omuntu ota ka nyengwa notashi eta opo a gwile moluhepo olunene naakwanezimo ye.”
METHANO: Flasio Building and Construction, yimwe yomoongeshefa dha tunga omagumbo ogendji mOshitopolwa shaHangwena, unene mondoolopa yaEenhana, ihe otayi monika methano ndika tayi tungu egumbo momukunda Okapya mOndangwa.
