Endiki lyedhina People’s Litigation Centre (PLC) olya ti otali ka kutha onkatu yopaveta ngele minista gwoohi ina etha oompangela dhe dhoku landitha po uuthemba wokukwata oohi kushaangoka e na oshimaliwa oshindji.
PLC okwa li a nyolele Minista gwOohi nOonzo dhoMefuta Dr. Albert Kawana kutya elanditho po lyuuthemba wokukwata oohi mefuta lyaNamibia osho oshinima sha nika uulingilingi notashi kutha po oompito dhaakwashigwana yoshilongo ya mone omahupilo omawanawa okuzilila moonzo dhomefuta lyawo.
Ndhika odhe ya po konima sho Minista Kawana a li a popi omwedhi gwa zi ko kutya uuthemba woku kwata oohi mbwoka wa kala momake gepangelo otawu landithwa po kukehe ngoka te ya e na oshimaliwa sha kola.
Kawana okwa li a ti kutya iimaliwa mbyoka tayi ka za melanditho ndika otayi ka kwatha epangelo mokukonditha omukithi gwoCovid-19.
Ihe oPLC oya nyolele Kawana momasiku 20 gaAguste 2020 ta yi ti Kawana ota landula omulandu gwokatendo komoveta yoohi noonzo dhomefuta hoka ka li ka tulwa miilonga koominista mbali ndhoka ngashingeyi dhi li mondjedhililo molwa uulingilingi moshikondo shoohi.
“Etokolo lyaDr. Kawana oku landitha po uuthemba wokukwata oohi olye etwa po molwa OVETA YOOMBUMBO DHOOHI yo2015 ndjoka tayi pe minista uuthemba a longithe oonzo ndhino ngaashi a hala,” omunashipundi gwoPLC tate Mathias Haufiku osho a popi ngawo momushangwa gwa tuminwa iikundaneki.
Haufiku okwa ti okwa nyolela Minista gwOonzo dhoMefuta Albert Kawana osho wo Minista wOshimaliwa Ipumbu Shiimi kutya ngele oya tsikile noompangela dhawo dhoku landitha po oonzo dhomefuta lyaNamibia pamukalo ya hala oku enda otashi ka thiminika oPLC opo yi kuthe onkatu yopaveta.
“Otatu ka thiminikwa opo tu ye kOmpangu yoPombanda yaNamibia ta tu pula ku ningwe etokolo lyopampangu li li muuwanawa wAanamibia,” Haufiku ta ti.
