Katongo nomulandithi gwiitowalekithi
Martin Negumbo| Okayolithi
Katongo etitano limwe okwa li a ka talela po kuume ke ha zi popepi nondoolopa yaNdangwa hoka ya kala nokunyanyukwa pamwe yo taya kutha ngaa moshikundu shawo shokatutu.
Molwaasho kuume ke ka li a teleka Katongo okwa zi ko u uvite ondjala yoyene yomepunda nokwa hingi etemba lye sigo omoNdangwa e teli kankameke pokano kamwe mpoka a adha po aakulukadhi taya landitha.
Katongo okwa li ena ashike oodola 5 adhike mondjato, ye nokwa yi pomukulukadhi gumwe meme Selma ta landitha oohi dhapya mombiga e ta thikile ta li sigo a li oohi ndatu omanga inaa pula ondando yohi kehe.
Paumwene okwa li ti ipula kutya kehe ohi oyi na odola niitano ashike hu a tekele hako taku hangwa nani esiku ndyoka.
Katongo okwa kutha mo oodola ntano e ta pe omukulukadhi, ihe omukulukadhi okwa ti;
“Gwedhapo ishewe oodola mbali niitano oshoka kehe ohi ohayi kotha oodola mbali niitano.”
Katongo okwa nukitha mo omeho. “Omolwashike oohi wedhi ninga ondilo ngawo? Oshike inoodhi ninga kehe yimwe odola yimwe nenge ngaa mbali?”
Omukulukadhi okwemu yamukula ta ti: “Ondando otweyi londeka shaashi otwa tulamo iinima oyindji moohi moka ngaashi omagadhi niitowalekithi ya yooloka.”
Katongo okwali a mwena po kashona, ye ti ipampadhala moondjato.
Meme Selma okwa li ya tseyathana nawa naye oshoka okwali a za momukunda gu li popepi nomukunda gwooKatongo, nuuna meme nguka a yi komahuliloshiwike okwa li iikando yimwe ha londo oshali metemba lyaKatongo okuza puundunda wopomukunda.
Ano mpaka odha hulu sho Katongo a yi mo ta ti: “Oo, ondishi wete oshoka naasho te li ine fa te li oohi, onda fa te li iitowalekithi oshoka inandi uva omulyo gohi, onkene taamba oodola 5 dhiitowalekithi mbi nda li mpa.”
Katongo okwa pilamene ko e ta hingi etemba lye.
