Martin Negumbo | omutoolinkundana
Okatanga kokoompadhi naka kalekwe po noinaka pumbwa okusa po nande nande. Ndhika odha popiwa komusamane Herman Kalimbo.
Kalimbo ngoka e li omuunganeki gomaudhano komahala gokomikunda okwa ti onkalo nande ya kala ombwinayi ethimbo nuule sha etithwa komukithi gwa konekiwa nawa koyendji gwoCovid-19, epangelo nenge elelo lyoshilongo olya adhika nale lya ndopa okukaleka po omaudhano miitopolwa ayihe yoshilongo.
“Ihe molwa pu na mboka tu lile po uuwanawa waadhani yokatanga kokoompadhi notu na ohokwe yoku kaleka po iitalenti yaagundjuka mboka yeshishi nawa uuna tashiya kokatanga kokoompadhi, iinyangadhalwa yomaudhano otayi tsikile,” Kalimbo ta ti.
Omusamane Kalimbo na Mr Kalimba oya li ya kongo ondunge opo ya ete po omaudhano gokomikunda nelalakano lyawo oku tala mboka ya pyokoka nawa noyeshi mpoka etanga hali thangwa.
“Ano otwa tokola opo omayinyanyudho dhingi gokatanga kokoompadhi ga kale aluhe haga ningwa pokapale kOnelago United pOomwandi mOshitopolwa shaShana mOshikandjohogololo Ondangwa-Rural.
Kalimbo okwa li a pandula aakuthimbinga, aayambidhidhi naadhani mboka taya holoka kuudhano mbuka Osoondaha kehe.
“Uudhano otawu kala hawu dhanwa Osoondaha kehe. Omikalo nesimanekathano lyopawuntu osho shimwe shomwaambyoka yi na okukalekwa po ethimbo alihe lyuudhano wu li mokapale,” Kalimbo ta ti.
Miitili Six naye okwa ti shika otashi yambula po aanona yokomikunda opo ya dhiginine omaudhano peha lyoku longa iimbuluma miitopolwa yawo.
Omutoolinkundana pethimbo a talelepo ehala lyomaudhano okwa mono kutya aakalimo yomoshitopolwa shika oyendji oye na shili ohokwe nehalo lyokukutha ombinga moshinyangadhalwa shika molwashoka etanga ndika kali na okatongotongo nande oshoka naakokele oyeli haya kutha ombinga muudhano mbu.
Methano: Ndjika osipana yaakokele yedhina Onelago Legends kohi yewiliko lyomusamane Six e li kolumoho nakuume ke Pohamba e li kolulyo ya tula osipana yawo pokati.
