Ominista yOshimaliwa tate Ipumbu Shiimi okwa li a pititha omutengenekwamwaalu gwoshimaliwa shepangelo tashi ka longithwa momukokomoko gwoomwedhi omulongo nambali tu uka.
Omutengenekwamwaalu gwoshimaliwa, ngoka haku tiwa oNational Budget nenge Appropriation Bill, ogwa pitithwa metitatu notawu ka kundathanwa momutumba gwopashigwana oshiwike tashi ya.
Shiimi okwa popi ta ti okwa tengenekwa epangelo li ka longithe oshimaliwa shi thike poobiliona 67.9, nonando okwa tengenekwa epangelo li ka mone iiyemo owala yi thike poobiliona 55.5.
Miitya yemwene Minista Shiimi okwa popi ngeyi sho a ndjandjukununa oshimaliwa nkene sha gandjwa kiikondo yepangelo:
“Shika otashi eta ndje piimaliwa nkene ya topolwa yi longithwe momukokomoko gwomumvo 2021/22.
“Oshimaliwa sha tengenekwa shi ka longithwe oshithike po N$67.9 billion.
“Mwaambika ota mu ka kuthwa N$8.5 billion tadhi futwa onga iishoshela dhomikuli twa lwa monakuziwa.
“Ano oshimaliwa tashi ka longithwa miilonga yepangelo oyi thike po N$59.4 billion, mbyoka ya topolwa ngeyi kutya o N$53.9 billion otayi longithwa miilonga yakehesiku yepangelo omanga yoN$5.6 billion tayi longithwa miilonga yehumokomeho.”
Iikondo yimwepo yepangelo otayi pewa oshimaliwa shi li ngeyi:
- Uuministeli wUuhaku otawu mono N$8.1 billion,
- Uuministeli wElongo nOonkuluhedhi otawu pewa N$13.8 billion,
- Uuministeli wElongo lyOpombanda otawu mono N$3.1,
- Uuministeli wUuthikepamwe nEkandulopo lyOluhepo otawu pewa N$5.4 billion,
- Uuministeli wIikwameni nEgameneno lyOshigwana otawu mono N$5.7 billion,
- Uuministeli wEgameno nIinima yOonakulwa otawu pewa N$5.4 billion,
- Uuministeli wUuyuuki otawu pewa N$491.4 million, omanga oshikondo shoompangulilo tashi mono N$371.2 million,
- Okomisi yOkukandeka Uulingilingi otayi mono N$62.8 million.
Methano oye Minista gwOshimaliwa Ipumbu Shiimi.
