By Martin Negumbo at Ondangwa |
Ehangano lyoku andjaganeka olusheno kiitopolwa yokonooli lyedhina Northern Regions Electricity Distributor (Nored) olya uvitha nawa oshigwana ishewe omumvo nguka sho lya tokola okugandja oobasali kaailongi yatatu, aamati yaali nokakadhona kamwe.
Oshikumungu shontseyo nuunongo osha kala tashi tengauka moshilongo nosha li sha tulwa poshiyalo omimvo dha piti sho aagandji yiilonga ya kala ya pumbwa aaniilonga ye na ontseyo nuunongo tawu pumbiwa ihe ohaya hulile muunyengwi molwashoka omwaalu gwaantu ye na ontseyo tayi pulwa omushona noonkondo.
Naashika ohashi etwa konkalo molwa pwaa na iimaliwa yoku futila aanona yalwe nonando oya pita nawa notashi pula opo ya ye kiiputudhilo yopombanda ngaashi kuUnam nenge koNUST.
Uupyakadhi mbuka owa eta eyitaalo nokuli moshilongo kutya onkalo yaantu yomwaalu omushona oyo ashike ye na ontseyo oyo uupyakadhi uunene nowakitakana kiikondo ayihe yopaliko moshilongo.
Omumvo gwa zi ko Nored okwa li a yamukula komukundu nguka sho a gandjele oobasali kaanasikola yalwe ye li kiiputudhilo yilwe yopaungomba nelalakano opo a tsakaneke epangelo ondjilakati moku yambidhidha aalongwa mboka kaaye na omakwatho ga gwana, unene nelalakano lyoku kwashilipaleka kutya aanyanyamagulu oya longekidhwa nuunongo wa gwana nontseyo ndjoka tayi nyanyudha onga oshizemo shoonkalamwenyo dhawo.
Petrina Johannes omugundjuka a za koshiputudhilo shoNUST okwa tsu Nored omukumo opo a tsikile ngaaka sigo aluhe oshoka uuna aanona taya ka mana omayilongo gawo otaya ka galulila uunongo wawo moshigwana pamikalo dha yooloka.
Teopolina N. Ndeshilile otiilongele onkatu yomayalulo koUniversiti yaNamibia omanga Stephanus A. Nanduwa otiilongele onkatu yuudhindoli momalusheno koUniversiti yaNamibia na Nedved N. Muleke naye otiilongele onkatu yuudhindoli momalusheno koshiputudhilo shaNamibia shuudhindoli nuunongononi oNUST.
Aailongi ayehe mbaka oye li momumvo gwotango kiiputudhilo yawo.
Nored okwa gandja ano oshimaliwa shi thike poN$90, 000 komumvo kehe momuilongi kehe, nokwa tengenekwa ta ka longitha oshimaliwa sha thika poodola omiliona yimwe uuna aailongi mbaka taya ka mana eilongo lyawo lyomimvo ne.
Methano: Aailongi yaamati mboka ya pewa omikandauvathano dhawo pamwe naavali oshowo aanambelewa yaNored.
