Uuministeli wUuhaku owa pititha olopota tayi ti miiwike mbika yehulilo lyomwedhi Mei noyetameko lyomwedhi Juni omukithi gwoCorona otawu kwata aantu oyendji mwa kwatelwa wo aanasikola naalongi.
Ihe Uuministeli wElongo owa pititha omukanda tagu ti nando ongaaka iilonga yelongo otayi pula komeho nonando kwa lopotwa kutya oshiwike shaziko omunasikola gumwe okwa sa koCovid-19 mOvenduka.
Uuministeli wElongo, nUuministeli wUuhaku, Ehangano lyAalongi oNANTU osho wo Ehangano lyAalongwa oNANSO oya li ya tsakanene ya kundathane oshikumungu shuupyakadhi woCorona shoka tashi iteyele moosikola.
“Otatu endulula ishewe kutya oosikola odha simana, ano opo elongo neilongo li ye komeho otatu pumbweni oku gwanitha po omilandu dhoku igamena koCovid-19, mwa kwatelwa oku zala aluhe uumaska, oku ikala kokule oshinano osho wo oku iyoga koonyala,” Omukuluntuwiliki gUuministeli wElongo meme Sanet Steenkamp ta ti ngawo.
“Uuministeli owe ipyakidhila nokukundathana naayehe mboka ye na oshinakugwanithwa opo kuyandwe omashongo ngoka taga vulu oku holoka po. Ihe etokolo lyokupata oosikola pakathimbo otali kala tali ningwa shi ikwatelela kosikola nosikola kehe ya gwililwa po.
“Otatu kumike oshigwana kutya otwiipyakidhila niilonga yoku tula po omikalo tadhi longo nawa opo oosikola dhi kale megameno pethimbo ndika edhigu. Oosikola noshigwana, kaleni mwa ngungumana e tamu longele kumwe opo ku kondjithwe oCovid-19,” Steenkamp ta ti ngawo momukanda.
Methano: Uunona wosikola tawu nyota ookombiuta (ethano kusolarpartners.fi).
