Omupresidende gwoshilongo Dr. Hage Geingob okwa halele elago omudhanitanga gwaNamibia Peter Shalulile ngoka ha dhana moliga yetanga yaSouth Afrika sho a dhana nawa noonkondo e ta simanekwa onga oye omudhanitanga a longo nawa e vule yakwawo moshilongo shoka.
Shalulile okwa pewa esimaneko kaadheulitanga osho wo aadhanitanga ooyakwawo kutya oye Footballer of the Season osho wo Players Player of the Season.
Geingob okwa popi ta ti: “Shalulile sho a simanekwa kaadheulitanga nokaadhani ooyakwawo otashi ulike eitulomo lye moshilonga she shuudhanitanga osho wo uunkulungu we mokatanga kokoompadhi.
“Otandi halele omahaleloyambeko omudhanitanga nguka sho a tumbalekitha Namibia moliga yetanga lyopombanda moSouth Afrika.”
Shalulile oha dhanene osipana yetanga yedhina Mamelodi Sundowns moSouth Afrika.
Omudhani gwaNamibia Deon Hotto ngoka ha dhanene osipana yedhina Orlando Pirates naye okwa simanekwa pegandjo lyomakopi lya li ko ohela, sho a hogololwa oye a li kapyoko mosipana yawo momukokomoko woshikako shomaudhano goMTN Cup.
