Ongundu yopapolitika yedhina Popular Democratic Movement (PDM) ndjoka oyo wo Ompilameno yoPambelewa, oya pititha omikanda mbali moka tayi ti kutya oya dhengwa nayi pomutima komaso gaasamane Samson Ndeikwila naWillem Konjore.

Ndeikwila naKonjore oya hulitha momasiku gokuuka kehuliloshiwike lya zi ko.

“Omuwiliki gwOngundu yOmpilameno yoPambelewa omusimanekwa McHenry Venaani ota gandja omahekeleko kaapambele, ookuume noshigwana ashihe shaNamibia molwa eso lyatate Ndeikwila,” PDM ta ti ngawo.

“Ndeikwila okwa li omuwiliki omuwanawa moshimpungu shomahangano goshigwana, a li wo omunyoli a simana nokwa li Omunashipundi gwehangano lyoBreaking the Wall of Silence (BWS). Iilonga ye yokuyambulapo oshigwana shaNamibia itayi ka dhimbiwa nando. Otatu ka dhimbulukwa wo uupenda we noondunge dhe.”

Omusamane Ndeikwila okwa li a tseyika onga omunandjungu gumwe a kala ta kondjitha Epangelo lyaNamibia osho wo ongundu yoSwapo opo aantu mboka ya dhipagelwa kombanda kuSwapo pethimbo lyekondjelomanguluko ya etwe puuyelele kutya oolye noya dhipagelwa shike.

Venaani okwa gandja wo etumwalaka lyomahekeleko kaapambele nookuume yaKanjore ngoka a li Oshilyo shoPaliamende shongundu yoSwapo.

Konjore okwa li wo omupevi gwomuwiliki gwOmutumba gwoPashigwana pethimbo lyOmupresidende Hifikepunye Pohamba, okuza 2005 sigo 2010.

Methano: Ongundu yoLandless People’s Movement (LPM) nayo oya tanga wo nakusa Ndeikwila molwa iilonga ye yokudheula aagundjuka.

Advertisements