Omupresidende gwehangano lyaanangeshefa yaNamibia oNCCI tate Bisey Uirab okwa ti ehangano lyawo olya unganeka aanangeshefa opo ya gandje eyambidhidho lya kola molugodhi lwokulwitha ombuto yomukithi gwoCovid-19.
“Mongashiingeyi omayambidhidho ngoka ga uvanekwa naangoka ga gandjwa kaanangeshefa oga thika pongushu yoshimaliwa shi thike poomiliona 14,” tate Uirab ta popi.
“Oomiliona 8 dhomoshimaliwa shino odha nuninwa egandjo lyombepo yokufudhila mo (ohapi) yomiipangelo, omanga oomiliona 5 dha nuninwa oku tula po iipangelo yopakathimbo, omashina gopauhaku osho wo iilongitho yopaunamiti.”
Uirab okwa ti ewiliko lyoNCCI osho wo yakwawo yomoshikondo shuunangeshefa mboka taya longele kumwe oya pandula molwa omakwatho ngoka taga zi maanangeshefa yoshigwana.
Yamwe mboka a totha mo ya gandja omakwatho ga kola ongaashi: Old Mutual, Pick ‘n Pay, Nedbank Pupkewitz Foundation, Namdeb, Hollard, Capricorn, O&L, Standard Bank, Barloworld, H1 Energy Pty, Namibia Breweries, Sanlam, Mincon Namibia, Namib Poultry Industries,
Letshego, FirstRand Namibia, Dundee Precious Metals, Securitas Insurance Broker, Namib Foam Pty, Vivo Energy Namibia, Scania Namibia, Santam Namibia, Momentum Metro, Navachab Gold Mine, naSwakop Uranium.
Methano oyo: Omupresidende gwoNCCI Bisey Uirab, Omukuluntuwiliki gwoNCCI Charity Mwiya, nOmunambelewa Omukuluntu moNamibia gwaBarloworld Elia Nandjiwa taya ulike eyambidhidho lya gandjwa kuBarloworld Namibia.
